博客文章
仲即時預留西貢戶外康樂中心做隔離用途。都唔怪得政府咁驚青，恐懼源於缺乏對疾病嘅認知，始終有太多不確定性，一旦大規模爆發，後果係不堪設想。
呢件事令霸戲哥諗番起2001年嘅炭疽恐襲事件。單案正正發生喺911之後嘅一星期，由於當時大眾對炭疽認知唔多，加上毒性猛烈，又殺人於無形，令全世界陷入一陣恐慌。最後事件導致5個美國人死亡，至少17人染疫，亦係史上最嚴重嘅生化攻擊。
炭疽桿菌一旦潛入人體，就會開始大量複製，然後釋放更多細菌進入血液循環，再釋放毒素，攻擊特定細胞同組織。記得亦喺嗰時開始，凡接收到有白色粉末來歷不明嘅信件，相關部門都會大為緊張。
最近Netflix有紀錄片《世紀炭疽恐襲》上架，由Dan Krauss執導，記述2001年呢次炭疽恐襲事件嘅始末，入面亦有好多珍貴嘅訪談，呈現調查人員、受害者家屬、生還者所面臨嘅觸目驚心經過。
霸戲哥
** 博客文章文責自負,不代表本公司立場 **
邊個話中秋節一定要食月餅？食薄餅又得唔得先？點解，事關豬視妹噚晚睇咗集Netflix嘅紀錄片《主廚的餐桌：披薩》，心思思想叫番個薄餅嚟食食。
《主廚的餐桌》十足鬼佬版《滿足的味道》，喺N記已有一定名氣，而呢個series共六集，題材當然係圍繞Pizza，但探討主廚嘅成功人生，其實先係主菜。
講到Pizza，人人都話自己係Pizza之王，但邊度先最堅？Pizza來自意大利拿坡里（另一說法係來自中國，詳見電影《摩登如來神掌》），屬低下階層食物，意大利人對Pizza極之講究，絕對唔容許加入菠蘿做配料，寧願餓死唔食。
講究還講究，好食還好食，睇完節目，有說全球最好食嘅Pizza，可能係亞利桑那州鳳凰城嘅Pizzeria Bianco。創辦人Chris Bianco知道要做好食嘅Pizza，只得一個秘訣，唔係水質、唔係烹調溫度、唔係煮法，而係食材嘅質素。佢做pizza嘅用料，由蕃茄、芝士、香料以至麵粉，都由Chris親自挑選，基乎每個pizza都由佢嚟主理。亦因為咁，Pizzeria Bianco開業冇耐已打響名堂，每日慕名前來品嚐嘅食客大排長龍，而Chris亦間接推動當地嘅Pizza文化，Pizza之王當之無愧。
香港都有好食嘅Pizza店，銅鑼灣就有一間，可惜屋企附近都係嗰啲連鎖店，冇計，頂住肚先啦。
