上個禮拜寫完《沖遊泰國》，估唔到反應係出奇咁好，霸戲哥諗到嘅可能性有三個：胡慧沖好受歡迎；香港人困得太耐；叉燒姐鄺玲玲張相見得吓人。
想知究竟係邊個原因，好簡單啫，做個control experiment就得啦。今晚呢集冇叉燒姐，取而代之係「冬蔭妹妹」Wanmai Chotika，佢主要負責喺鏡頭前行行企企搞gag過場，聽晚開始仲會以泳裝亮相添。
有時真係幾佩服胡慧沖，能夠將看似平平無奇嘅景點，講到「非去不可」咁，今集介紹清邁，感覺上比曼谷荒蕪好多，所謂嘅「景點」驟眼睇真係冇乜特別，但胡慧沖用佢嘅說話節奏同幽默感，依然介紹得頭頭是道，的確有料。
睇多幾集，話唔定真係可以消除到霸戲哥對泰國嘅偏見。
霸戲哥
** 博客文章文責自負,不代表本公司立場 **