噚日突然收到BBC push，法國電影大師尚盧高達離世，享年91歲。

世事往往就係咁橋，晏晝扭開電視，重播緊《阿飛正傳》，張國榮發表佢套無腳雀仔論，而呢句金句並唔係王家衛度嘅，而係出自佢偶像尚盧高達套《不法之徒》。

霸戲哥認識呢位法國電影新浪潮嘅靈魂人物，全因為以前工作嘅戲癡上司，當年成日推薦我睇《不法之徒》同《斷了氣》，當然上面提到「無腳雀仔」嘅小趣事，亦係佢分享嘅。

同戲癡上司共事多年，佢擴闊咗我對電影嘅睇法。後來因工作關係，開始接觸更多法國電影新浪潮作品，好似杜魯福嘅《四百擊》、積葵丹美嘅《秋色伊人》、伊力盧馬嘅《慕德的一夜》咁，仲寫過篇專題講法國電影新浪潮添。

尚盧高達創意無限，鍾意顛覆傳統，所以佢嘅作品都會有意想不到嘅效果。最經典要數《不法之徒》嘅dancing scene，突然拎走配樂插旁白，觀眾仲以為係咪條片有事。

霸戲哥最印象深刻反而係《周末》，其中一幕用一個長鏡，展示大塞車場面。導演本身對中產主義極度反感，佢借汽車比喻消費主義，而長鏡去到尾係車毀人亡嘅畫面，箇中意義顯然而見。

感謝尚盧高達為現代電影帶來衝擊，霸戲哥亦趁呢個機會，向戲癡上司講聲多謝。




霸戲哥

** 博客文章文責自負,不代表本公司立場 **