*

霸戲哥之日常#416| 中年圓夢

早兩日霸戲哥落街場踢波,唔知係天氣太熱定對手太young,踢到好似依家嘅C朗咁,冇腳好波又力不從心。睇嚟遲早都要報「老人league」先夠踢。

原來唔止足球有為中坑而設嘅40+聯賽,歌唱比賽都一樣有。無綫最近搞咗個《中年好聲音》招募,邀請35歲以上、對音樂仲有熱誠嘅朋友參加歌唱比賽。招募通告一出,口痕友梗係又指指點點啦,話廣場大媽都可以嚟碰吓運氣。

又唔使吓吓都諗負面嘢先嘅,認真諗其實條橋真係work喎,除咗食到gimmick,最重要係畀到機會中年人圓夢。

好似舊同事C咁,識佢嘅人都知佢歌藝超班,比起嗰班所謂歌星好唔知幾多皮。霸戲哥以前啲惡搞歌,大部份都搵佢去唱,貪佢快靚正之餘,最厲害係佢扮學友得,扮Eason又得,連羅文都難佢唔到。

如果舊同事C參加,霸戲哥肯定瞓身支持。

霸戲哥

** 博客文章文責自負,不代表本公司立場 **