王祖藍主持嘅《有個閨密叫祖藍》，霸戲哥一直有追開，佢同一般訪談節目嘅分別，係祖藍同嘉賓建立到份互信，令嘉賓放下戒心，將心底話分享畀觀眾。
今晚呢集嘉賓比較特別，就係00後嘅炎明熹。祖藍大大話話都大佢廿年，兩個就算冇代溝，又點樣做到閨密呢？
GiGi參加《聲夢傳奇》奪冠後入行，後來北上參加芒果TV同TVB合辦嘅《聲生不息》，紅遍全中國，成名前後不足兩年，好難想像一個17歲嘅中學生，竟然可以承受到咁大壓力。
貴為「火星女神」，喺節目少不免展現無厘頭風格，祖藍明顯招架不住，不過GiGi都有分享After Class成員Chantel、Yumi同Windy之間嘅關係，同埋點解咁怕同人溝通嘅真相。
想了解GiGi更多鮮為人知嘅一面，就要留意今晚節目。
霸戲哥
** 博客文章文責自負,不代表本公司立場 **