*

霸戲哥之日常#421| J2監察站(34):簡單的快樂

今晚J2有新一輯《仨心友行3》播出,承接上輯,繼續由黎諾懿監製同主持,
主題係體驗簡樸田園生活,尋找最原始的快樂。豬視妹睇完猛話正,梗係啦,有三位靚女李佳芯、麥美恩同劉穎鏇坐陣,有鄉郊,又有美人,唔覺唔覺半個鐘話咁快就過。

都市人生活勞碌,手機不離手,放工返到屋企已經攰癩癩,就算賺到個錢又點吖?反而久唔久去鄉郊柄埋幾日(當然要有伴啦),最好去冇訊號嗰啲,熄咗手機,靜靜感受一下大自然。釣吓魚,捉吓蟹,餵吓蚊,個人認為咁先係最純粹嘅快樂。

節目入面,黎諾懿要幾位靚女玩兒時玩意「東南西北」,霸戲哥細個梗係有玩,「東南西北睇吓邊個最咸濕」嘛,不過真心唔記得點摺,同埋記憶中好快已經畀其他小遊戲取代(如天下太平、彈擦膠、孫悟空)。

講開又講,呢代小朋友仲玩唔玩孫悟空呢類枚呢?定係已經有其他枚可以猜?豬視妹侄仔早排教我哋玩「hamburger」(包剪泵變奏版),估唔到都玩咗成程巴士,仲嘈到差啲畀人趕落車。

所以話,快樂真係好簡單。

霸戲哥

** 博客文章文責自負,不代表本公司立場 **