*

霸戲哥之日常#419| J2監察站(33):捱罐頭

香港人生活節奏急促,個個都話唔得閒煮飯,寧願叫foodpanda同捱罐頭。霸戲哥住hall嗰陣,都成日食罐頭,水仙花牌五香肉丁、肥豬仔午餐肉、三花牌腸仔係「醫肚三寶」,貪佢一開罐倒落個麵度就食得。

罐頭食品種類繁多,但係咪真係咁好食先?好似豆豉鯪魚咁,霸戲哥覺得腥到暈好怕食。後來聽人講,原來仲有種「極品」叫瑞典鹽醃鯡魚,瑞典文surströmming,齋睇個名已經似嘔吐物,極唔開胃。但當你打開蓋,嗰陣強烈嘅臭味令人作嘔,全因裏面嘅細菌經過發酵,產生極多難聞氣體如硫化氫、丙酸同丁酸,所以比腐屍還要臭,試問又點擺得落口?

今晚J2節目《關注關注組》,主題係罐頭食物,施焯日同蔡景行仲化身試食死士,挑戰德國「忌廉辣汁緋魚」,聽個名就知「硬嘢」啦。想知德國定瑞典難啃啲,就要留意節目啦。

霸戲哥

** 博客文章文責自負,不代表本公司立場 **