《香港小姐競選》，霸戲哥真係細細個就聽過佢個名嘞，今年係50周年，TVB都算大陣仗，就算受疫情困擾，成個project存在好多變數，都要移師去紅館搞，因為要搞得好好睇睇。唔會好似香港開電視 ，求其搵班波女湊夠人數又話選美。
相信港人個個都自以為係專業評審，覺得眼光係全宇宙最好，貼唔中就話無綫造馬，其實邊有咁多陰謀吖！港人睇吓鬧吓讚吓又一年，唔覺唔覺咁就幾十年。至於泳衣問答環節，講真年年都係咁上下，或者全香港，就只有余黎青萍一個覺得比堅尼太少布，應該遮到上頸先啱數。
平心而論，今屆港姐質素係爭啲，三甲似乎都呼之欲出㗎嘞。反而今屆嘅
司儀陣容仲有話題性，除咗鐵膽嘅曾志偉、阿叻、崔建邦、森美嗰啲，仲有元祖級嘅陳欣健同鄭丹瑞，呢個司儀陣容有今生、冇來世。
講咗咁耐，霸戲哥同豬視妹最期待嘅，其實係黎明嘅表演，九十年代嘅回憶當堂返晒嚟！
霸戲哥
** 博客文章文責自負,不代表本公司立場 **