一場突如其來嘅世紀疫症，令全球陷入恐慌，擾攘接近三年，有啲地方（如香港）仍然未能回復正常生活。人與人之間嘅距離，最少隔住塊面紗，亦有從此陰陽永隔。
世界各地雖然有唔同嘅文化背景同科技配套，但面對住同一種病毒，都無一倖免地陣腳大亂。
今個星期有齣電影《暴風之年》上映，由七個短片組成，記錄咗呢場疫情所發生嘅小故事。七個分別來自伊朗、泰國、美國、智利同新加坡嘅導演，用佢哋嘅電影語言，講述驚心動魄故事，入面提到嘅恐懼、隔離、聚散同監控，喺疫情下有重新嘅定義。
其中一條短片由新加坡導演陳哲藝執導，周冬雨主演，講述一對北京居住嘅小家庭，因疫情令經濟拮据，除咗健康受到威脅，家庭關係亦受到嚴峻嘅考驗。
《暴風之年》今個禮拜四上映。
霸戲哥
** 博客文章文責自負,不代表本公司立場 **