國際賽周完結,意味住英超戰火重燃。今星期戲碼強勁,分別上映兩場打吡大戰,今晚先嚟北倫敦打吡阿仙奴對熱刺,而聽晚就有曼市打吡。

每次北倫敦打吡,霸戲哥都會私訊兒時死黨補習天王T打吓牙骱。由細到大佢捧阿仙奴,霸戲哥就熱刺,無論兩隊經歷高潮低潮,我哋都一心守護愛隊,視對敵係死敵。話時話,下次北倫敦打吡,補習天王T應該已經喺英國了。

論近年往績,北倫敦打吡嘅作客球隊未贏過。但紀錄係要嚟破嘅,熱刺今季四把尖刀簡尼、孫興文、古路錫斯基同李察利臣輪住磨,死火嘅孫仔上場都撻着番,唯一暗湧係門將羅理斯可能傷勢未癒,唔係呢場十拿九穩。

至於曼市打吡,我諗邊隊作客都冇乜關係啦,賽果只不過係大炒定小勝啫。曼城前鋒夏蘭入球停不了,曼聯有邊個守將mark得實佢?唔通真係出麥佳亞咩!




霸戲哥

** 博客文章文責自負,不代表本公司立場 **