*

霸戲哥之日常#438| 美麗晒冷

之前有報道講過話活地阿倫宣佈退休唔拍戲,好彩香港仲有個「MK活地阿倫」葉念琛,佢監製、編劇同執導嘅TVB台慶劇《美麗戰場》今晚開播,大家又可以留名等睇愛情金句。

霸戲哥同豬視妹坐定定睇咗頭一集,感覺都唔錯,節奏明快,係啲劇情稍為娘少少,不過完全符合葉念琛嘅風格。叫得《美麗戰場》,唔少得梗係靚女晒冷,第一集已經有陳瀅、陳曉華、劉佩玥、蔣家旻、郭柏妍同游嘉欣登場,高登仔收晒貨啦。

睇開葉念琛嘅戲,都知道女主角一定叫「阿寶」,「琪琪」就多數都係奸嘅,今次嘅「阿寶」係陳瀅,而「琪琪」就係蔣家旻。喺「葉念琛電影宇宙」入面,蔣家旻都做過「阿寶」嘅,就係電影《第一次不是你》入面扮演援交少女。始終撈過電影,感覺上蔣家旻演技,比起其他靚女有層次。

至於大家最期待畫面、葉念琛御用男主角「万刀甲」只係出一出場,想睇佢嘅演出,可能要等多幾集嘞。

霸戲哥

** 博客文章文責自負,不代表本公司立場 **