*

霸戲哥之日常#439| 重陽雜談

今日係重陽節,漢代相傳「重九」最初只屬民間迷信,百姓要登高先可以遠離災禍。後世慢慢演變成憑弔先人嘅傳統節日。中國有春秋二祭,重陽就係秋祭。
秋祭咁文雅,聽落唔慣,講「拜山」就地道好多,又設合港人嗰種連拜山都嫌麻煩又趕頭趕命嘅特性。
香港連墳場都好有特色,一個個骨灰位排到密麻麻,外國人嚟到梗係嚇一跳。當年《世紀戰疫》嚟香港拍攝,就去咗荃灣華人永遠墳場度取景。
至於港產片呢,最經典梗係陳果套《香港製造》,入面有好多場景都喺粉嶺和合石墳場度拍,當中梗係有隱喻喺入面啦。
早幾年霸戲哥約陳果導演重遊舊地做訪問,事前一早拜晒土地做晒儀式,點知roll機嗰陣依然係怪事連連,到第日霸戲哥踢波仲斷埋Achille’s tendon,要大唞半年,都咪話唔邪。
依家寫番呢段經歷出嚟,個心仲怯怯哋呀。

霸戲哥

** 博客文章文責自負,不代表本公司立場 **