張偉文預告明年再開演唱會 經理人方俊：佢本質係屬於舞台

張偉文狀態回勇愈嚟愈精靈！

張偉文的歌手經理人方俊開《星級靚聲演唱廳》直播，請來吳香倫胞妹吳江倫擔任嘉賓，大唱經典歌郭小霖《從不知》、林憶蓮及王傑的《還有》、徐小鳳《消遙四方》等，為10月10日起，每隔兩周的線上節目《歲月如歌》做熱身。方俊做張偉文及老牌新加坡歌手麗莎經理人，兩班Fans得知他做《星級靚聲》直播即幫手推節目及課金，令方俊非常開心。

張偉文經理人方俊10月4日晚舉行《星級靚聲演唱廳》直播。

方俊請來吳香倫妹妹吳江倫擔任嘉賓。​

當晚方俊大唱經典歌郭小霖《從不知》、林憶蓮及王傑的《還有》等。

除獲張偉文忠粉幫手推節目及課金外，方俊更獲環星娛樂老闆張國林力撐。​

直播現場有樂隊伴奏。

三場《張偉文友情有義演唱會》於今年8月大功告成，方俊指張偉文獲好多朋友友力撐，故計劃明年同張偉文合體開演唱會：「疫情後好多歌星都出返嚟開騷，演唱場地唔易book到，我哋入咗好多個明年嘅期，睇吓book到咩場地啦，當然今次演唱會以張偉文做膽，暫未構思主題。偉文冇催促我幾時有騷開，不過我每次問佢『開唔開騷呀？』佢都好期待追問返我『咁幾時呀？』我就答佢隨時都開得㗎！佢就秒回『好呀！』」

三場《張偉文友情有義演唱會》於今年8月大功告成。

張偉文獲勁多Fans支持。

張偉文每場見到歌迷都感動到爆喊。

方俊話張偉文最愛就係唱歌。

張偉文係屬於舞台嘅。

方俊認為，雖然69歲嘅張偉文患有失智症，但對他來說唱歌好似食菜咁，一啲壓力都冇，他更指最近張偉文狀態回勇愈嚟愈精靈，可以跟他互窒，而且大部份思路都清晰：「佢近期記憶力可能差少少，但舊事就記得好清楚，尤其係歌詞，每次食飯，佢都好似隻開籠雀咁係咁唱，佢本質係屬於舞台嘅，係開心地唱，因為佢嘅技能就係唱歌。如果唔畀佢唱歌，要抑壓住佢對佢身體反而冇咁好。」方俊指張偉文唱得開心，活得開心，係一個樂天嘅藝人。

有得唱歌嘅張偉文變得好精靈。​

連食嘢都多咗嘢講。

同方俊及方麗盈飲飲食食好開心。

方俊為張偉文上塔香祈福，兩人好好感情。

方俊在演唱會上與張偉文相擁哭個不停，場面感人！

方俊4月15日在新光戲院舉行《維港口腔呈獻方俊燃亮愛演唱會2024》，獲恩師「靚聲王」張偉文在台上力撐，師徒更合唱一曲《每當變幻時》，張偉文不停流淚，方俊和他相擁哭個不停，場面感人，姚煒則以特別嘉賓身份上台獻花，至於方麗盈、王美蘭及新加坡歌后麗莎則助陣演出。

演唱會一開始方俊先以演繹8分鐘電視劇主題曲medley，包括靜婷《痴痴地等》、關正傑《殘夢》等，還演繹《訪英台》《山歌姻緣》。方俊更藉著今次個唱給予視障人士發揮才華平台，邀得香港盲人輔導會轄下The Cheers 樂隊合唱《We Can Overcome》，讚揚視障朋友正面樂觀態度值得敬佩。之後姚煒驚喜上台獻花，她被感動得眼有淚光，有感而發道：「好多人問我點解對方俊好？因為我覺得喺圈中搵唔到呢種人，佢係一個孝順仔，對朋友好又真心。見到佢同視障人士演出嘅場面真係好感動，散發出好大嘅感染力及正能量，亦給予我好大嘅鼓勵。」

方俊與香港盲人輔導會轄下Cheers樂隊合唱 「We can overcome」

之後由3位表演嘉賓分別演繹自己名曲外，方俊和方麗盈合唱《叉燒包》時，麗莎姐姐在後台第一次聽到這首歌曲，更笑言以為他們唱 「衰仔包衰仔包」，大家都捧腹大笑。張偉文則成為壓軸嘉賓，方俊特別選唱了張偉文的首本名曲《離別的叮嚀》鋪排恩師出場，方俊對偉文說：「屋企我同媽媽相依為命；但喺舞台就同你相依為命，你知唔知有好多歌迷很想見到你？好關心經常問我你現況？其實呢個舞台係屬於你嘅。」張偉文即爆喊，台下粉絲狂叫「加油」，sharp醒的張偉文回應說：「我知道！」方俊感性道：「落實開騷第一時間係通知你，更特別揀選唱你嘅名曲唱畀你聽。」張偉文呼籲觀眾全場一起開著手機燈一齊唱。二人便合唱了一曲《每當變幻時》，唱歌期間張偉文不停流淚，場面感人，方俊多謝大家一直關心張偉文的健康：「今日大家見到佢係一個健康嘅人，唔理世界點變幻，我哋都係咁愛錫張偉文。」之後著全場觀眾開著手機燈來個千人大合照，將相片放在張偉文的床頭，提醒他有很多人支持及愛錫他。

當方俊為大家送上全新歌曲「鼓舞」時，方俊竟然與一班美少女中學生勁歌熱舞，美少女中學生與現場觀眾紛紛為方俊喝采及歡呼，方俊首次在台上載歌載舞，驚喜連場。Encore 時方俊一口氣唱了3首羅文經金曲《長城謠》、《好歌獻給你》、《願望就是明天》，為個唱劃上完美記號。