廖慧儀何泳芍拍到攰懶得鬥性感《港女野人》姊妹情深恨拍第2季

四女宿營期間大談人生。

四人好多體力勞動。

好辛苦咁爬山。

疫情下《港女野人》拍足7個月，橫跨春夏秋冬四季，所以4人着運動Bra top及羽絨亮相，節目中有唔少大晒身材畫面。4人否認靠着少啲搶Fo，Amber表示，試過35度酷熱天氣下進行戶外及水上活動，為怕中暑惟有着得清涼啲嚟散熱；Nicole反而堅持着長袖衫踩單車，咁就唔會曬傷及刮傷；Jessica相信愈着得少去行山愈危險；Honey笑言大家當時都攰到死，會互相禮讓：「你去你去(拍攝)。」

Honey曾扮拗柴受傷行唔到，由Nicole孭住落山。

四個囡囡各有賣點

Nicole強調，拍攝時拋低港姐包袱進入野人Mode，已唔會再計較我靚啲定你靚啲，只係想做返自己最真實一面，後期她更剪短頭髮，甚至會用海水Gel頭。另外節目中唔會有鬥靚競爭環節，大家亦冇時間處理妝容，有集她和Jessica在旅行車瞓醒，眼屎都未清理，頭都未梳就被拍，首個反應係嚇到遮面。Honey稱4人素顏出鏡，屬完全放棄治療妝。問到4女邊個身材最出眾？Nicole認為大家都有長處，大讚Jessica有前有後有腹肌，身材fit到爆；Amber雖然細細粒但有黃蜂腰；Honey長腿兼有34D好身材；而她勝在身高1米68，會高啲啲。另外，Honey拍攝期間曾扮拗柴受傷行唔到，由Jessica及Nicole輪流孭住落山，行咗成個鐘，即使係造假，姊妹情深都好感動，事後大家都激動爆喊，令她最難忘。