10月21日,美股隔晚表現反覆,英國首相請辭,成為英國史上最短命首相,早段美股因為呢個消息高開,其後又有儲局官員鷹,美股調頭向下,三大指數最終倒跌收市。道指跌90點;標指受制3800阻力,跌29點;納指則喺11000點前止步,隔晚跌65點,報收10614。10年期美債息升至4.23%,科技股偏弱,之前納指仲有啲龍頭股頂住,但呢兩個星期,蘋果公司跟Tesla等已明顯轉弱,納指亦倒水咁倒。下周四蘋果將公布業績,要睇睇業績公布如何。至於Tesla股價喺跌穿265重要支持後走勢向下,業績公布後股價進一步跌至207再穿5月低位。由於電動車股一早已炒過籠,喺債息高企下,難免被殺估值,加上其生產線暫時已達到頂點,未來一兩年難再持續高增長,面對64倍咁高PE,唔被殺估值已至出奇。SNAP喺業績公布後,股價又出現急跌兩成,睇嚟今次業績期,美股未能藉此翻身。不過當重磅龍頭股都殺到豬頭咁款,美股跌浪就有機會進入尾聲。

至於港股噚日午後由低位反彈,早段下試16000心理關口,16000好友力抗淡友,再借內地可能放寛隔離政策而挾升,日前已有內地航空公司準備復飛國際航班,呢個消息可能有機會好快宣布,空穴來風必有因。港股噚日挾升成交回升至1268億元,但要睇跟住呢幾日,成交係咪可以維持喺1200億元之上,如能持續有資金流入,先有條件見底,不過16000呢啲大位都要尊重嘅。不過港股喺呢半年,成交持續萎縮,變成棄嬰一樣,日日陰乾,一浪低於一浪形態未變,反映買家已無心入市,就算有反彈,持貨者都只係想趁機走人,散戶亦無心戀戰,唔多願入市,至於內地喺二十大開幕時,已強調動態清零方針不變,即使放寛隔離政策,一日要搞隔離,無論幾加幾都好,當全世界已復常,中國仍然集中火力抗疫,實在難與世界接軌,咁嘅情況下,A股跟港股都係繼續無乜運行。