世界盃衞冕冠軍法國喺八強遇上歐國盃亞軍英格蘭，呢場強強對碰無疑係一場冠軍前哨戰。佢哋由分組賽階段，直到殺入八強同樣充滿說服力，亦都分別克服咗突發傷兵同耗員問題。
應屆歐洲足球先生賓施馬喺世界盃前最後一刻嘅受傷缺陣，對法國對嚟講係最大嘅損失。好在代替佢嘅老將基奧特今屆表現神勇，已經為球隊貢獻咗三個入球。之前基利安麥巴比曾經表示過夥拍基奧特令佢踢得更舒服，佢獲得嘅五個入球亦證明所言非虛。
英格蘭方面早前有賓韋特因為私人原因離隊，另外翼鋒史達寧因為屋企遭爆竊，亦都已暫時離隊返咗倫敦。好在鋒綫方面無論布卡約沙卡、菲爾科頓抑或美臣蒙特都能當大任，而且估唔到拉舒福特作為後備殺手亦表現得相當稱職，佢同沙卡已經各入三球成為隊中神射手。
呢兩支球隊無論邊隊最後出綫，都唔值得奇怪。「麥總」加「銀河唯一」固然頭頂腳踢樣樣有，「阿傾」拍着一班後生仔都絕對有數講，而且「福哥」更可能成為改變比賽嘅一路奇兵！既然大家都有咁嘅攻力，就算兩隊主帥再保守，都難以阻止對方入球。
代替賓施馬的基奧特(9)表現神勇，已有三個入球。