兔年似乎與獅子相剋,今年特別多醒獅蝦碌事件曝光。近日再有網民在facebook討論區上載醒獅甩轆短片,見到醒獅隊在一辦公室內採青時不但失手,更採至假天花塌下,情況狼狽尷尬又論盡得有點搞笑,網民感嘆「真係大吉利是囉」,有人則補鑊,指是「落地開花富貴榮華」、「鴻運當頭」。
短片長約1分鐘,在羅鼓聲襯托下,橙色獅子正架勢地採青,順利食過生菜後,卻將對聯卷軸頂在獅鼻位置,由於離開獅口,舞獅頭的師傅無法伸手解開卷軸。
醒獅隊另一隻橙色獅子於是醒目地踏著箭步出場接力,但懷疑用力過猛,將對聯卷軸連同假天花一同扯下。霎時間,假天花骨牌式連環倒塌,甚至擊中獅頭,情況狼狽又惹笑,現場傳出觀眾爆笑聲。中過頭獎的獅子頂著尷尬氛圍,七手八腳在假天花廢墟中完成任務,成功張開寫有「財源廣進」的對聯。短片完結前,採青失手的獅子踩著假天花殘骸再次出場,來個首尾呼應。
由於片中出場人物無戴口罩,加上旁觀者疑似操普通話,網民懷疑是舊片,而事發地則估計是內地或東南亞地方。
網民:財源廣進去人地個袋
對於如此論盡的採青情況,網民感嘆「真係大吉利是囉」、「開年就要破財擋災」,直情是「祝你:財源廣進去人地個袋」,有人則補鑊指是「落地開花富貴榮華」、「鴻運當頭」。另有網友形容「呢招叫石破天驚獅吼功,證明咗隻獅生猛極具霸氣,呢隻獅嘅利是要大封D」。
對於採青禍及假天花,有網民言指「應該用剪刀時你又唔用」、「用鉸剪丫麻天才」,並擔心醒獅隊此行「無得賺仲要賠返錢」。另有人笑言「搵隻獅驗樓一流,豆腐渣工程無所遁形」;有人則從生物科角度去看,指「貓科動物,都鍾意搞破壞」。
帖文來源:大埔 TAI PO