食客帶長者到黃大仙某酒樓，點了$698元的套餐，埋單卻變過千元，於是發文斥「不良銷售屈老人家」。
有食客帶長者到黃大仙某酒樓，點了一個$698元的套餐，但埋單卻變過千元，食客發文指責酒樓「不良銷售，屈老人家」。(FB截圖）
該食客於Facebook群組「飲食黑店大全」發文，表示日前因有親戚到訪，於是一同前往黃大仙某酒店晚膳「諗住近近地，平平地」。他們選了餐牌上的B餐$698「夠曬5個長者和工人姐姐食」。豈料埋單時，帳單竟然顯示要$1187。
樓主立即查看帳單發現「居然變咗 A 餐！但枱單係手寫B餐喎！」收銀阿姐好冷靜地話「你食咗喇喎。」樓主立即與對方理論指「我叫B餐，你手寫枱單都係B餐，仲寫埋價錢$698，你地落單就 A餐？趁住全枱老人家傾計，冇留意食咗，你地就可收多$300？」阿姐則以「自信」的口吻回應「你冇留意條魚唔同？食之前你唔出聲？而家你食咗，你享受咗，咪當同老人家食餐豐富啲囉」。
套餐A及套餐B價錢相差300元 ，差價就在於蝦變了龍蝦，虎杉斑變了海星斑。(FB圖片）
從餐牌可見，樓主點的B餐包括有「金湯焗珍寶蝦球伊麵」及「清蒸生猛虎杉斑」，而較貴的A餐則包括「上湯焗澳洲龍蝦伊麵」及「清蒸游水海星斑」，其他菜式一樣，差價就在於蝦變了龍蝦，虎杉斑變了海星斑。
樓主不滿認為「A 餐同 B 餐，係龍蝦 / 蝦球 和條魚唔同，其他小菜係完全一樣喎！老人家掛住傾計，留意唔到，要硬食？」；她更質疑酒樓有「不良銷售，屈老人家」之嫌「從亞姐嘅專業反應和對答自如，有理由相信唔止一次發生此類事件啦，好明顯係刻意落個貴餐，收貴幾百蚊」。
最後他們也逼不得已付了過千元的帳單離開「老人家好肉赤，離開酒家仲好唔憤氣，亦好唔明 究竟落單果個錯，定係食果個錯！」；樓主亦憤而發誓以後不會再光顧該酒樓。
侍應手寫單是B餐，但埋單打印單卻是A餐。（FB圖片）
此帖一出即引起網民熱議，網民意見兩極，有人認為餐廳的做法非常可疑「佢見你哋老人家多， 睇死你唔敢搞大件事 ，應該報海關，有證有據，一定告得入」、「有咁多證據落單係B餐，咁呢個落錯A餐，係食肆酒樓嘅責任，並唔係食客嘅責任！」、「上菜前無理由唔知係出錯菜，但唔理照出，食完錢照收。」、「條魚蒸到嚟仲要問條係乜魚？咁不如問你條魚有冇成斤重啦，哩啲侍應收銀肯定係慣犯啦。」。
網民意見兩極，有人認為酒樓有蠱惑，有人則認為責任在客人一方。(Getty圖片)
但有人則認為責任在食客一方「上枱都識分龍蝦同蝦喇掛，你果時唔出聲嘅？」、「龍蝦與蝦球差好遠喎，睇唔出就有點兒那過」、「蝦同龍蝦都分唔到，但你又識分998同698」、「既然唔係全枱老人家，咁要有人識分蝦同龍蝦我覺得唔過份。」、「講真大家都有錯喎，唔好下下似老賣老，話俾我聽埋單就知698，食就唔知係龍蝦喎。」、「貪小便宜圍爐就收皮喇。真係當人傻咩？叫b人地上錯a諗住側側膊唔多覺拎著數話分唔到？」
帖文來源：Facebook群組「飲食黑店大全」
