*

十位候選港男大晒冷

《香港先生選舉》周六(9月10日)在電視城舉行決賽,觀眾可以透過手機應用程式投票選出心水港男。本網記者率先找來最後十強訪問,到底他們覺得自己有何長處和短處?心目中最大競爭對手又是誰?

 

資料圖片

資料圖片

 


1. 鍾君揚(Freeyon)

年齡:27
職業:教師

 

鍾君揚(資料圖片)

鍾君揚(資料圖片)


優點:我覺得自己大方得睇,剛柔並重。我自己覺得言行舉止好重要,要做好榜樣先代表到香港。剛柔並重因為我準備緊唔同喺騷做嘅嘢,希望將唔同方面發揮出嚟。


缺點:休息得唔夠,自己有啲緊張,同埋都想做到最好出嚟。可能瞓少咗會影響表現,會注重休息多啲。


最大對手:我自己唔係好想諗其餘九個參賽者,我想同以前同依家嘅我自己鬥,唔想唔進步,不斷去進步更新自己,多啲嘢去挑戰自己,發揮得最好。

 

 

2. 麥凱程(Alex)

年齡:23
職業:畢業生

 

麥凱程(資料圖片)

麥凱程(資料圖片)

 

優點:我喺外國返嚟,我啲廣東話有口音,會有啲新鮮感。


缺點:都會係廣東話,呢兩個月盡量學多啲廣東話,同成班兄弟(參賽者)傾多啲偈。我覺得有進步,希望遲啲繼續進步落去。


最大對手:都係自己,每個人都唔同,冇得比較。最緊要做好自己,我一定努力表現自己。

 

 

3. 梁裕恆(Flow)

年齡:31
職業:消防員(已辭職)

 

梁裕恆(資料圖片)

梁裕恆(資料圖片)


優點:我生活裡面不停令自己進步,我喺人生裡面已經準備得好好,外在同內在都會平均。


缺點:我係處女座,我覺得自己每方面都做得唔夠好,每方面都有得進步,外內都係。健身想收個比例再靚啲,內面我會繼續做好本份,本份永遠都唔會夠。


最大對手:我會揀自己,因為人生冇必要同人比較,只要今日嘅自己贏到噚日嘅自己,其實我覺得已經贏咗。

 

 

4. 黎振燁(Jackson)

年齡:30
職業:模特兒

 

黎振燁(資料圖片)

黎振燁(資料圖片)

 

優點:我係咁多位參賽者裡面最高嗰個同埋膚色最黑嗰個,啲人覺得我好陽光,但其實我好有內涵,我偏向靜多過動,我鍾意睇書,睇電影,聽歌。我希望我一啲內涵嘢可以俾到觀眾睇。


缺點:當然有好多嘢改善,冇一個人係完美。我絕對同完美仲差好遠,但我每一樣嘢力臻完美。我相信我好多嘢都可以活躍啲、主動啲同埋外向啲。


最大對手:我相信係我自己,今次十位參賽者,十個都好平均,條件都好好,我挑戰咗自己先再挑戰佢哋。

 

 

5. 胡㻗(Fei)

年齡:22
職業:營運經理

 

胡㻗(資料圖片)

胡㻗(資料圖片)


優點:我好陽光好正面,我自己好鍾意做運動,想帶正能量俾大家。 


缺點:我好怕羞,但係都唔緊要,我會全力以赴。


最大對手:其實冇對手,我哋成班好似兄弟咁,我哋盡量做好個騷俾大家睇。冇諗過對手,由觀眾決定。

 

 

6. 馬俊傑(Linus)

年齡:26
職業:模特兒

 

馬俊傑(資料圖片)

馬俊傑(資料圖片)


優點:斯文嘅外表,同埋健康嘅體魄。


缺點:自己太懶惰,平時督促自己做多啲嘢,唔俾自己懶落去。


最大對手:Christian(楊灌澤),又靚仔跳舞又叻。

 

 

7. 楊灌澤(Christian)

年齡:19
職業:學生

 

楊灌澤(資料圖片)

楊灌澤(資料圖片)


優點:當然係跳舞,我對自己表現都好有信心,因為我平時習慣喺大型比賽喺好多觀眾面前表演。

 

缺點:我好誠實同埋容易信人。


最大對手:我覺得係Jeffery(梁賢基),因為佢都跳舞,但我哋跳唔同舞。

 

 

8. 伍禮騫(Thomas)

年齡:24
職業:模特兒

 

伍禮騫(資料圖片)

伍禮騫(資料圖片)


優點:我外表比較man,我性格其實好溫柔。如果鍾意外剛內柔嘅男人,我就一流。


缺點:我有時會比較懶,不過我好多時都好努力。


最大對手:我哋十個嘅質素都非常之高,一時間好難諗邊個係最大對手,最大對手暫時係自己,因為我自己仲有好多缺點,同埋好多進步空間,我會不斷挑戰自己,令自己成為一個真正嘅香港先生。

 

 

9. 丁子朗(Karl)

年齡:19
職業:學生

 

丁子朗(資料圖片)

丁子朗(資料圖片)


優點:我嘅笑容夠年青,因為今年19歲,係最年青嘅參賽者,同埋佢哋(其他參賽者)話我笑得好大聲。


缺點:佢哋(其他參賽者)個個身型都好好,我都會努力啲Keep fit,令自己大隻啲。因為我覺得香港先生除咗要有內涵之外,身型都好緊要。依家每晚都狂做Sit-up同時又去做Gym,希望比賽當日大隻啲。


最大對手:冇話強敵,每個人都走唔同路線。我走青春文青嘅路線,好難講邊個係最大對手。

 

 

10. 梁賢基(Jeffrey)

年齡:21
職業:學生

 

梁賢基(資料圖片)

梁賢基(資料圖片)


優點:我對才藝(表演)有信心,因為我由細到大都有打功夫,之後到韓國訓練舞蹈。


缺點:我做乜都想做到100%,所以呢個帶俾我有啲壓力,想做到最好。


最大對手:我係溫哥華嘅「型男家族」冠軍,所以係多倫多嘅「型男家族」冠軍Freeyon(鍾君揚)。