得寵先生｜周秀娜謝安琪邱士縉齊撐首映 廖子妤自覺中年危機感謝新戲令她振作

Fish表示：「好多謝呢套咁好心地嘅電影，將我喺中年危機，撈返番嚟！」

寰亞電影《得寵先生》昨日（11月28號）上映，前一晚在MCL新都城戲院舉行首映，全院滿座，反應熱烈。適逢男主角鄭丹瑞（旦哥）69歲生辰，除了電影導演兼編劇何英毅和李志偉、女主角盧慧敏（Amy）、廖子妤（Fish）、馮允謙（Jay）和黃美芬等一齊睇戲，還有近百位圈中好友入場支持，非常熱鬧。完場後觀眾席上好友林珊珊、林超賢導演、陳慶嘉導演、陳德森導演、謝安琪、邱士縉@MIRROR和周秀娜等星級觀眾發言，令人感動。Fish更自爆一度覺得自己步入中年危機，對事途迷惘，但這部電影令她振作，對世界再抱希望。

《得寵先生》日前舉行首映，全院滿座！

電影完場，觀眾報以掌聲，Amy、Jay和Fish突然拉住旦哥上台玩驚喜，手忙腳亂地替他戴皇冠、彩帶和送鮮花，主持旨呈哼歌助慶。旦哥突然「佳叔」上身鬧人：「搞乜呀？咪整亂我個頭呀！」全場爆笑，觀眾大叫「好靚仔」！而旦哥另一部電影飾演女兒的鄧月平，亦準備了生日蛋糕送上台，旦哥好開心。

眾演員在映後分享感受。

Amy、Jay和Fish拉住旦哥玩驚喜。

旦哥另一部電影的「女兒」鄧月平亦準備了生日蛋糕。

旦哥好開心！

Fish感嘆：「我依家嘅人生好似有好多好混亂嘅嘢，我要重新去接受，我又要照顧爸爸媽媽，爸爸媽媽開始老啦，我嘅事業去到一個位，我應該點做？頭先睇完套戲，諗：『如果我去到70歲，我嘅人生係咁失敗，我會點呢？』但係只要唔放棄，人生幾多歲都可以重啟。我一路睇戲一路覺得，其實我啲問題好細，只係需要去學習。尤其是悅娜（Amy飾演）角色，點解有人咁好心地？但係真係有眾多咁好心地嘅人，支持緊呢個世界，而呢個世界唔係我想像中咁差，好多謝呢套咁好心地嘅電影，將我喺中年危機，撈返番嚟！」

Fish指這部電影令她振作，對世界再抱希望。

旦哥說：「今日我69歲生日，真係緣份，竟然有一部自己嘅戲上映。香港拍電影唔容易，拍完呢部戲佢哋都唔知幾時再有得撈，今日我生日，邀請到一班真心好朋友嚟同我一齊，睇一部有火嘅電影。」觀眾席上林超賢導演大叫：「成套戲對你（旦哥）挑戰好大啦！」旦哥哈哈大笑說：「識貨！」

旦哥

林珊珊抹眼淚，對旦哥說：「真係做得好好，好為你驕傲，旦！當然Jay Fung都做得好，個個演員都做得好好。多啲呢啲戲，我哋就感受多啲溫暖、多啲希望！」而旦哥的「永遠女神」周秀娜亦感動落淚，她說：「旦哥係一個好幽默嘅人，好少會見到佢呢一面，我無諗過我會喊，好感動，旦哥真係演得好好，我好鍾意！」

林珊珊

林珊珊睇到落淚。

兩年前在電視劇《野人老師》中，與旦哥飾演父子的Stanley說：「我同旦爸拍劇嘅時候，佢同期拍緊呢部電影，佢真係好犀利，同一時間駕馭兩個完全唔同嘅角色，最值得學習係旦爸對戲劇嘅追求，超級respect（敬佩），亦多謝導演拍咗一部咁誠懇嘅電影！」

Stanley

去年與旦哥合作新戲的謝安琪，先恭喜旦哥生日快樂，她說：「睇到一個好不一樣嘅旦哥，而題材將被遺棄嘅狗仔同獨居老人串連埋，好有感受。我哋嘅城市好繁忙，忙住生活，好多時忽略咗生命與生命之間嘅感情。你喺我心目中係一個又健康又開心又正能量嘅人，喺呢部戲見到你落泊嘅神情，一個獨居老人，我好傷心。希望多啲人被呢部戲感動，多啲關心身邊嘅人、身邊嘅生命，讓我哋嘅社會多啲愛！」

謝安琪

與旦哥相識幾十年的導演林超賢笑說：「剛才娜姐（周秀娜）話未見過你呢一面，其實幾十年前，你啲樣衰我哋見好多。」旦哥笑說：「所以我要鼓起勇氣叫晒《小男人周記》團隊、阿嘉（陳慶嘉導演兼編劇）嚟睇。」林導認真地說：「多謝台前幕後，老人與狗嘅戲大家睇好多，呢部喺自己生活世界入面，特別打動，尤其是講到棄養，造出好多不幸，令人好感概！旦哥，你喺鏡頭前喊，我第一吓接受唔到，但你繼續喊，我真係畀你打動，好嘢！」身旁的陳慶嘉說：「呢個唔係我見到嘅阿旦，好犀利，見到一個唔熟悉嘅你，做得好好！」

林超賢

林超賢、陳慶嘉

台上旦哥哽咽，他說：「呢啲說話由我合作得最耐嘅好朋友講出嚟，真係頂唔順，多謝！」至於另一位導演好友陳德森非常感觸，因為感同身受，他說：「獨居長者同隻狗，我隻狗啱啱過咗身，好難過。我一直都有關注流浪狗，呢套戲我一定會好好推介，多謝你哋！」

陳德森

此外，捧場的圈中好友還有《得寵先生》音樂總監T-Ma（馬敬恆）、向海嵐、林珊珊兩位女與李澄和李怡、梁釗峰、雲浩影、Vian@me&、許恩怡、音樂人Heyo、「中年好聲音」 的丁文俊、羅啟豪、魏家信和林鉫偉等，星光熠熠。

鄧月平

謝安琪

向海嵐

林珊珊兩位女與李澄和李怡

雲浩影、梁釗峰

Vian@me&

許恩怡

Heyo

「中年好聲音」 的丁文俊、羅啟豪、魏家信和林鉫偉。

旦哥憶述中暑暈倒當日在狗舍露天空地，拍攝一場他與Amy打掃的戲份！

鄭丹瑞（旦哥）、盧慧敏（Amy）與廖子妤（Fish）合作新片《得寵先生》上映，近日四出謝票宣傳，旦哥被爆料拍攝期間中暑暈倒地上，Amy與導演誤以為他即興加戲，事後旦哥笑言指摘他們見死不救！

海報

旦哥說：「我中暑嗰日，我睇到人性嘅冷暖，尤其是呢個Amy Lo，得我哋兩個人做戲之嘛，我中暑暈低，『嘭』聲瞓咗喺地，佢只係望住我。」Fish好奇地問：「係咪以為你做緊戲啊？」旦哥說：「所有人都以為我仲做緊戲！因為之後導演同我講，佢當時心諗『做得幾好喎⋯點解仲唔起身？』」Amy說：「係呀，事後我哋全部嚇到黐線！」

劇照

劇照

劇照

旦哥憶述中暑暈倒當日在狗舍露天空地，拍攝一場他與Amy打掃的戲份，他說：「當時中午一點幾，又唔放飯，電影就係咁，導演又唔肯放飯，三十幾度，好曬，嗰場戲我洗緊狗屎，突然眼前一黑，我就『嘭』一聲瞓低。後來有工作員話我知，當時我同一個石級只差少少，如果一撞落去就『係咁先』！」

劇照

Fish問：「當時timing好好，精妙到以為係戲，用唔用到？」旦哥可惜地說：「用唔到，唔啱劇情。」他笑言怪責當時同場的Amy：「你係目擊證人，而你選擇不顧而去！」Amy解釋：「我當時真係以為佢扮暈。（你唔會諗劇本冇呢場戲？）佢成日即興，我當時心諗『都幾誇張喎』，無他他咪（墊褥）㗎喎，因為當時旦哥坐喺一張普通櫈上，跌落地，普通人都係好大件事，嗰日佢仲包住條腰，有腰痛。當時一部攝影機拍住我，另一部拍住佢。佢跌倒之後，我心諗：『死啦，導演未嗌cut喎，我繼續演自己嗰部份。』因為我諗起周星馳嗰句『導演未嗌cut都要繼續演』！」眾人爆笑。旦哥說：「周星馳影響你咁緊要？人命你都唔理，周星馳唔係教你見死不救喎！」Amy稱導演嗌cut後，旦哥仍然無反應，大家就知出事了！

劇照

有驚無險，旦哥回復清醒，他笑說：「當時導演走埋嚟關懷備至問候我，然後俾咗兩個選擇我，一係依家繼續拍，一係休息一陣繼續拍！然後我自己會諗，如果我係導演我會點呢？我都係會叫演員繼續拍，因為時間好緊迫。」他笑言後悔：「我應該做返一個演員，堅持要返屋企。」他還反過來安慰導演。又說：「佢哋搵咗間房，有冷氣嘅，畀我休息、瞓吓，但佢哋不停入嚟問我『得未』。作為監製、演員，又做過導演，我好理解，所以真係唔係幾好意思瞓咁耐，結果嗰日我真係拍晒。唔好以為電影世界好殘忍，其實經常都發生！」Amy透露其他工作人員亦有苦自己知，旦哥強調大家都好有責任心，一句「無事無事」繼續工作。他說：「香港拍電影就係咁，時間又少、成本有限！」Fish說：「所以希望大家支持香港電影，等大家成本高啲，令到中暑嘅人得到妥善嘅照顧！」旦哥大叫「講得好」。

劇照

故事大綱：

60 歲臭脾氣的長者任春佳（鄭丹瑞 飾）一直過著獨居生活。他在被迫退休後回望自己的一生：婚姻失敗、父女關係疏離。生無可戀的他決定上山尋死，幸好垂死一刻被流浪狗燒腩發現，引領動物義工鄧悅娜 (盧慧敏 飾)救他脫險。燒腩的靈性與令人窩心的舉動，令原本討厭狗的佳叔對流浪動物改觀，也與悅娜成為了好友，並加入悅娜所辦的動物中心「汪之家」當義工，幫助被遺棄的動物。悅娜亦助佳叔能藉此解開與女兒任素儀（廖子妤 飾）積壓了二十多年的心結。正當佳叔以為人生將要重回正軌的時候，他所住的村莊卻突然發生數十隻流浪狗被毒殺事件⋯⋯