Jay對農曆新年傳統習俗一知半解。
恭喜發財!「唱作王子」馮允謙(Jay)率領兩位美女,「寰亞孻女」黃淑蔓(Feanna)和「仙氣女神」雲浩影(Cloud)向大家拜年,祝各位財源滾滾、身體健康!在外國長大的他對農曆新年傳統習俗一知半解,連「碌柚葉」都未聽聞,Feanna和Cloud立即為他惡補,當他聽到新年不可以掃地就好開心,懶做家務的他笑言:「放心,我好少掃地!」
馮允謙(Jay)率領黃淑蔓(Feanna)和雲浩影(Cloud)向大家拜年。
捧著「財神」的Jay說:「祝大家新一年賺多啲,我希望自己事業再上層樓,寫多啲好歌、唱多啲好歌畀大家聽。」Cloud拿著揮春說:「我手上『大吉大利』揮春,寓意我開『大』啲嘅騷,然後出『大』碟,賺『大』錢唱『大』歌,盆滿缽滿,所有嘢都『大』!」Feanna就像醒獅一樣調皮可愛,她笑說:「祝大家好似醒獅一樣龍馬精神、畫『蛇』添福。我係蛇女,今年犯太歲,大家都記得要去攝太歲!我蛇年心願,就希望可以做晒佢哋兩個( Jay和Cloud) 嘅願望!」
Jay在外國長大,連「碌柚葉」都未聽聞。
每個家庭都各有農曆新年小習俗,Feanna期待吃媽媽下廚整水餃,她說:「每年都會同爸爸媽媽一齊倒數迎接年初一。媽咪每年都會包餃子,喺其中一粒餃子入面放開心果,邊個食到就嗰年會好幸運。另一個習俗就係初一唔准洗頭,好辛苦呀!」Cloud說:「我屋企唔准沖涼,話會洗走運氣。」Jay說:「我仲知道唔可以剪頭髮。」Cloud補充:「新年唔可以掃地,要掃都要由大門口掃入屋,咁就唔會掃走啲好運。」Jay哈哈大笑說:「放心,我好少掃地,所以屋企好污糟。」問Jay知否「碌柚葉」用途?Jay表示不知道,Feanna說:「年廿八要連埋碌柚葉一齊沖涼,可以洗走衰運。」Cloud搶答:「坊間有碌柚葉嘅沐浴露,唔使真係揸住碌柚葉沖涼啦!」
Cloud自爆屋企訂兩份盆菜,由年卅晚食到初二!
除了打掃清潔的習俗,Cloud表示屋企新年一定食盆菜,而且會訂兩大個,由年卅晚間食到年初二,還會不停加入食物,最終變成打邊爐,而她最愛吃瑤柱,笑言:「因為瑤柱會煮到散晒,所以我一開始就食晒啲瑤柱。」Jay笑瞇瞇說:「我最鍾意食蝦,因為我鍾意笑哈哈。」Feanna說:「我鍾意食髮菜,因為我鍾意發財,其實我哋鍾意『食字』!」
如果要放一樣喜愛的食物入盆菜,Jay立即說:「我最鍾意食burger,但點樣放入盆菜?」Feanna笑指勁違和。Jay爆料:「我哋有一個同事食乜嘢都加茄汁醬。」竟然觸發到Cloud靈感,說:「盆菜食得多會滯,我覺得要加少少酸味刺激吓,我建議加啲青檸汁。」Feanna笑言:「感覺好泰式。我自己就想加羊腩,因為我覺得盆菜同羊腩煲都幾襯。」
Feanna期待吃媽媽下廚整水餃。
Cloud在完場後更現身與粉絲一對一合照。
雲浩影(Cloud)本月20日推出全新專輯「TOUCH OF ABSENCE」,並於西九文化區自由空間大盒舉行新碟音樂會,逾400張門票10分鐘火速售罄。由於是自由座,「迷雲黨」(Cloud的歌迷暱稱)一早到場排隊爭取最有利位置睇騷,還購買限定版親筆簽名海報留念,場面熱鬧。Cloud更在其中一些海報悄悄寫上祝福語或者畫圖案,成為特別版,隨機買到的幸運兒即場打開都表示好驚喜。
Cloud於本月20日推出全新專輯「TOUCH OF ABSENCE」。
並於西九文化區自由空間大盒舉行新碟音樂會。
「迷雲黨」一早到場排隊入場。
又購買限定版親筆簽名海報留念。
音樂會開始由音樂總監蘇道哲帶領樂手上台,穿著白色長裙的Cloud出場,以新碟內作品《世界多了一個陌生人》、《慢性分手》和《引我笑》,為音樂會揭開序幕。Cloud說:「其實每一次表演前我都好緊張,點解會咁緊張?係咪我不能夠勝任呢?後來我發現因為我好在乎大家、好在乎每一次演出。我好開心今日同大家分享,第一次有機會唱咁多首歌。」然後她演唱輕快作品《DIZZY》和新歌《雲的自述》。之後她自彈自唱《To Let A Good Thing Die》前表示從未公開表演,顯得有點緊張,彈了一句便要求從頭開始,觀眾報以掌聲和歡呼聲打氣,然後Cloud飲水重整心情,順利表演。
Cloud以多首新碟內作品為音樂會揭開序幕。
又自彈自唱《To Let A Good Thing Die》
Cloud唱出大熱作品《回憶半分鐘》,觀眾揮動手機燈海,非常美麗。而她翻唱作品《黑玻璃》時,她與觀眾互動一齊做出揈毛巾動作,全場笑聲。最後她演唱即將派台、第一次公開表演的新碟歌曲《你在我不遠處》,她感觸地說:「我好少分享TG group嘅link,好開心呢個小家庭越嚟越大嘅時候,仍然令我感到安心,我仍然覺得呢個係一個避風港可以同大家分享,我自己亦都好安心去做自己。」並表示這新歌是為歌迷而唱。
Cloud還翻唱洪嘉豪的《黑玻璃》。
第一次公開表演的新碟歌曲《你在我不遠處》。
音樂會結束全場大合照時,觀眾送她驚喜,將手幅翻轉並一齊講出字句:「鍾意咗你好耐啦!」之後她在場外巨型海報前與觀眾一對一合照,長長人龍排了大約兩個小時,龍尾排出戶外。Cloud接受訪問時說:「我好驚喜,我直情覺得變咗韓星,因為手幅係韓星文化,完場翻轉手幅畀偶像睇Fans心中嘅說話。」
全場大合照
「迷雲黨」為Cloud送上驚喜。
完場後,Cloud又在場外巨型海報前與粉絲一對一合照。
Cloud又表示:「好開心見到咁多人支持自己,同埋見到由一開始就跟住自己嘅Fans,好難忘嘅moment。(你喺上台好感觸?)我望住呢一班人,其實佢哋同我一齊長大,所以我覺得好感動,同埋我喺人群當中見到我妹妹,所以覺得好感觸。」Cloud更說:「我有啲擔心佢哋喺出邊排隊等會好凍,因為最初嗰啲(觀眾)仲感受到啲體溫,慢慢去到後邊嗰啲,佢哋拎埋嚟嘅album越嚟越凍,知道出邊應該好凍,我要快啲影,等佢哋唔好喺出邊等咁耐。」她又笑指部份歌迷會講些話,讓她記住自己,十分可愛。
Cloud見到這麼多人支持她,覺得好感動。
林珊珊、郭啟華
梁釗峰都有到場支持。