Skip to Content Facebook Feature Image

焚焚~有咩問題&對症下藥

絲打

焚焚~有咩問題&對症下藥
絲打

絲打

焚焚~有咩問題&對症下藥

2016年12月06日 10:12 最後更新:11:04

唔知咁多位鏈尾有冇掛住焚焚呢~因爲呢排公事私事都太忙喇!又巴林show又11月會展show!真係心力交瘁,加上結婚旺季朋友紛紛掟炸彈,所以呢兩個禮拜都冇upload文落度⋯⋯⋯⋯咁最大原因焚焚係懶咗嘅!錯就要認!同大家講聲唔好意思先!不過我會答應大家,無論係《巴士的報》又好,《焚焚的珠寶鏈尾生涯》都好!以後會寫多啲文,希望唔好忘記我開呢個專頁嘅目的!

。 。

首飾的問題
咁講番我地呢篇文嘅主題先!今次我想同大家分享一下首飾容易出現嘅問題。珠寶首飾都會有佢嘅問題,除咗要小心啲之外,佢地都會有佢地嘅弱點,我地了解弱點,再對症下藥,咁珠寶先至襟戴嘅!簡單啲尼講,帶珠寶其實係唔expect 你戴住訓覺,沖涼,做運動,BBQ,焗桑拿同游水嘅!因為呢一啲外來因素都係傷害緊你啲珠寶,令佢地好快玩完,咁你都唔想一件咁貴買番尼嘅心頭好,同逐一儲番尼嘅碼頭咁快就玩殘㗎?

。 。

K金常見問題
因為大多數嘅K金都唔會好似珠寶店買嘅K白呀玫瑰金色,其實原身係啞啞哋嘅色!要經過電金水電鍍先至會好似珠寶店嘅靚色!可以用染髮尼比喻,你唔會天生係金毛,要經過漂染先可以去到好似鬼妹咁靚,而染上去嘅色係會經日子而甩色!K金都係,長年累月嘅外來因素,好似空氣氧化,或者人體出汗,都會令K金外層電色脫落,雖然可以係若干年後嘅事,而拎番珠寶店重新電鍍翻新都只係幾百蚊起(視乎件首飾大小而定),不過如果錫住佢的話,可以耐啲先洗呢一筆錢丫嘛!

。 。

寶石的弱點
我地已知出咗名脆弱嘅寶石好似珍珠,晶石咁好自然會對佢地細心呵護,但唔好忽略咗摩氏硬度9嘅寶石同10嘅鑽石呀!你聽就聽佢地好似好堅硬,其實佢地都係好脆弱。佢地大多數都有裂紋,而呢啲裂紋係會隨住外來衝擊而愈生愈大;而鑽石本身有解理紋,縱使世上最堅硬寶石都有弱點,一衝擊到要害時影響佢價值不但只,你隨時要同佢講拜拜添呀!
你唔好以為我得個講字呀!試過有個朋友隻鑽石介指粒鑽石邊係崩咗一忽㗎!所以為免發生啲無妄之災,都係對佢温柔啲好~

。 。

如何對症下藥
其實幻想一下,對住佢就好似對住你鍾意嘅人咁!你唔會對佢粗粗魯魯家嘛!你係會好温柔咁呵護佢,唔會比佢受傷害,珠寶就好似情人咁樣!所以最好就係你出席一啲場合你先戴,而戴完你就除出尼,用布抹下佢,就擺番落首飾盒度,而佢地最好唔好受到摩擦或者碰撞!鏈與鏈就盡量唔好放埋一齊,以免佢打kick。定期去番買嗰間嘅金鋪度做番清洗。大公司有度好嘅就係佢嘅售後服務,幫你免費清洗之餘仲會幫你檢查一下個粒石有冇鬆到!就算有咩修理都會酌量收費,從而做到定期保養嘅效果。今次就分享到呢度,下一次再講!

。 。

如果喜歡焚焚寫啲嘅嘢,就唔好吝嗇你地嘅like,你地嘅支持就係我嘅動力。想知多啲有關珠寶嘅嘢,可以去《焚焚的珠寶鏈尾生涯》度睇下!如果有咩想問或想我寫的話,留言比我!盡量滿足大家。好吧!我地下星期一見!

。 。

帶定頭盔:本人意見並非所有業內人士之意見,如有得罪,敬請原諒。

。 。

PS. 文章最底有就個評分架!拍爛檔幫我like 一like丫~~!!




焚焚

** 博客文章文責自負,不代表本公司立場 **

往下看更多文章

焚焚~ 自我介紹: 鏈尾

2016年08月19日 08:28 最後更新:18:18

咁多位《巴士的報》讀者你地好,我叫焚焚,好高興可以喺新開嘅女性頻道「絲打」同大家見面,非常感謝《巴士的報》嘅邀請成為「絲打」嘅blogger,可以同咁多位絲打分享一啲關於珠寶同珠寶業嘅事。

誰是焚焚?

介紹一下我自己先,我係焚焚,珠寶界食物鏈中屬最低層,所以稱為鏈尾。係女仔都鍾意啲靚嘢,尤其係珠寶。珠寶業比人感覺好易揾錢同時亦同時比人感覺好神秘。當初就係誤信珠寶業多姿多彩而入行。讀過一啲珠寶課程,包括GIA鑽石文憑。入咗行四五年倒,呢四五年裡面,大公司細公司都做過,對行情運作都有一定嘅熟悉,無論珠寶嘅種類,到珠寶業嘅每個崗位都略懂一二。

點解會開始寫嘢?

今年市道開始差咗,開始有裁員潮,令呢一行個個都人心惶惶,包括我。加上珠寶業工作壓力大,無從宣泄。咁嘅環境底下,轉工又唔係,辭工又唔係,轉行都唔係。所以,焚焚喺兩個月前開始Facebook專頁《焚焚的珠寶鏈尾生涯》,喺網絡嘅虛擬世界入面,將自己所見所聞,都毫無保留咁分享比大家知。呻下工作中嘅慘事,等絲打們唔好跌入珠寶業陷阱、亦都寫一啲珠寶業後勤嘅工作、再順便寫少少一啲珠寶嘢,等大家唔使讀什麼珠寶課程都可以有一啲珠寶嘅common sense 。

會點寫?

焚焚會用口語去寫我啲文章,因為用廣東話去寫大家會容易睇啲,親切啲,等絲打們睇得暢快啲!我撐廣東話!我寫嘢嘅風格偏向踏實,唔會離地。我會介紹一啲行內術語比大家認識,但唔會用啲你地聽唔明嘅專業名詞去拋書包,亦都唔會打一啲上網都揾得倒嘅廢話,識中文字,一定睇得明!等絲打們可以知多啲,學多啲!焚焚嘅文章會逢星期一刊登。

最後,無論喺Facebook專頁定還是喺任何平台,焚焚都會用來心寫好每一篇文章,希望咁多位絲打們可以睇得開心~!不過,可以喺一個接近三百萬讀者嘅平台等大家認識焚焚,係開心,係興奮嘅!多謝絲打~!多謝《巴士的報》~!!多謝盧生~!!!

如果喜歡焚焚寫啲嘅嘢,就唔好吝嗇你地嘅like,你地嘅支持就係我嘅動力。想知多啲有關珠寶嘅嘢,可以去《焚焚的珠寶鏈尾生涯》度睇下!如有咩想問或想我寫的話,留言比我!盡量滿足大家。好吧!我地星期一見!

PS. 文章最底有個評分架!拍爛檔幫我like 一like丫~~!!