娛圈事
現年94歲的「影壇常青樹」胡楓（修哥）早前因急性膽管炎引發膽石堵塞，一度情況危急，需緊急送入深切治療部（ICU）並插喉昏迷長達4日。憑著強大意志力，修哥最終奇蹟甦醒，連醫生也形容他「喺天堂打咗一個轉」。
蔡一傑IG影片截圖
在 Instagram 查看這則帖子
康復出院後，草蜢成員蔡一傑日前（8月12日）特意上門探望，更親自下廚為修哥準備飯菜。從分享的影片可見，大病初癒的修哥雖然身形略為清減，但面色紅潤、精神奕奕，思路清晰兼中氣十足。兩人更一同重溫修哥昔日的表演片段，有說有笑，場面溫馨。不少網民大讚蔡一傑有心，同時紛紛祝願修哥身體健康，繼續精靈活潑。
蔡一傑IG影片截圖
蔡一傑IG影片截圖
蔡一傑IG影片截圖
現年94歲的「修哥」胡楓一向以老當益壯見稱，早前更成功舉辦演唱會，成為「舉辦演唱會最年長的華語藝人」，狀態令人佩服。不過，早前他突然身體不適，當時對外僅透露感染新冠肺炎，令不少粉絲擔心。
張學友同張家輝都係修哥契仔
演唱會時仲清神奕奕
直到今日（30日），胡楓與新抱Jojo拍片親自報平安，才首次公開原來病情遠比外界知道的嚴重。Jojo透露，當時胡楓患上的其實是膽管炎，更一度情況危急，需要入住伊利沙伯醫院ICU，甚至昏迷4日。
今日胡楓與新抱Jojo拍片親自報平安
Jojo解釋：「早前爸爸唔舒服，我哋只係同人哋講爸爸中咗新冠，同埋因為流感高峰期我哋唔俾佢出街，咁其實佢係好危急嘅膽管炎，佢係入咗伊利沙伯醫院嘅ICU嘅。頭尾都昏迷咗四日，因為要插喉，佢當時嘅呼吸係好唔OK嘅，醫護人員話要插喉先至可以幫到佢，所以我哋就因為太擔心，亦都唔想大家知嘅時候，驚有記者去醫院度騷擾到醫護人員，亦都騷擾到佢。」
新抱Jojo幫忙解釋
修哥其後分享與主診醫生的對話，醫生坦言他今次可說是在鬼門關走了一趟，令修哥直言：「好恐怖！」
修哥更分享與主診醫生的對話
醫生亦解釋病因，透露今次除了替他疏通膽管外，亦已進行膽囊切除手術，避免日後再次發作。面對修哥的感謝，醫生幽默回應：「你大命！喺天堂打咗個轉，上天話你唔好咁快嚟享福，香港好多市民都掛住你，你遲啲先上嚟享福，所以先救返你，都係你自己嘅福氣啦。」
談到從昏迷中醒來的一刻，修哥仍然歷歷在目。他說：「當我擘大眼嘅時候，覺得呢度好陌生，有個醫護人員就問我，你叫咩名啊？我答中咗，佢非常之開心。雖然醒咗，但係非常非常之辛苦，可以講五花大綁綁住我隻手，唔俾我拗到個面，又唔可以掂到心口，驚我掂到啲喉就唔係咁好，所以一直落嚟係好辛苦。」
雖然治療過程艱辛，但修哥對醫護人員充滿感激。他表示：「雖然我摸到佢隻手好凍，我感受到佢內心嘅熱情，對我非常之好。」他回憶，有一次睡夢中摸到醫生的手，忍不住問：「醫生，你隻手點解咁凍？」醫生笑答：「係呀，我啱啱洗咗手！」這段經歷令他至今難忘。
修哥又透露，在昏迷期間腦海不停浮現家人、朋友，以及契仔契女的身影：「喺我睡夢中，不斷不斷記起我屋企人，我啲仔女、新抱、同埋弟弟妹妹，仲有所有所有嘅朋友，我都想見返。」
除了親友外，他更提到一直收到不少網民的鼓勵，成為支撐自己撐下去的重要力量：「令到我非常之積極嘅，就係諗起有好多網友鼓勵我，平時鼓勵我身體健康，樣樣都要積極，所以我呢段時間都有諗起佢哋。」
修哥最後再次感謝伊利沙伯醫院ICU及浸會醫院的醫護團隊一直悉心照顧，又表示經歷過生死後，更珍惜與身邊人的相聚時光：「我喺睡夢中嘅時候我就同自己講一定要對所有好朋友、屋企人，見返一面，所以我而家做得到，我會多啲同大家傾偈、同大家見面㗎！」
他又笑言，希望盡快與契仔契女見面，並感謝多年來一直支持自己演唱會及演藝事業的朋友。經歷這次生死關口後，修哥坦言未來會繼續積極面對人生，珍惜每一次與大家相聚的機會。
修哥要健健康康
