林嘉華時隔五年再接拍TVB新劇《燦爛的外母》，原來係薛家燕提議合作，其實已經60歲嘅嘉華哥，外表卻相對年輕，跟36歲在劇中飾演他女友的姚子羚睇落非常登對，原來佢KEEP住逆齡嘅方法。
林嘉華靠少食多餐保持青春。(東星圖片)
2012年拍完《飛虎》離開TVB，嘉華哥轉過港視拍咗5套劇，到15年約滿，今次重投娘家，全因為家燕姐牽線，「我睇過劇本好鍾意，尤其係『涂威龍』呢個角色，加上好耐冇演喜劇，而且家燕姐同珍姐（高層曾勵珍）都提議我返去，咁就接拍啦。」
姚子羚於劇中飾演嘉華哥女友(東星圖片)。
劇中嘉華哥分別同楊娜、姚子羚大演感情戲，女拍檔愈夾愈後生，但佢就話觀眾唔好研究演員真實年紀：「對演員起晒底，咁樣睇劇會唔投入，最好係睇荷里活西片咁，大家都唔會理主角嘅演員身份，只要佢哋做到好戲就得啦！」
嘉華哥自己唔多食，反而孝敬雪梨姐(東星圖片)。
又難怪製作人會咁樣老少配，只睇外型嘉華哥真係唔似花甲之齡，話佢大對手超過20年都冇人信，到底佢有咩逆齡生長秘訣呢？體育節目主持出身嘅嘉華哥，居然自爆唔多做運動：「我唔做運動㗎！唯一近似係釣魚，但係喺加拿大間屋好少唔郁，阿媽都笑我周圍走，因為我好鍾意修剪個花園。仲有我從來唔節食，阿囝近來鍾意整西餐，阿媽自然係煮中菜，成家日日有好嘢食。所以我拍呢套劇嗰陣，都四圍搵菠蘿油食，不過可能我每餐只食七分飽，配合少食多餐，於是咁多年磅數同身形都冇乜點變囉！」
《燦爛的外母》劇組大合照(東星圖片)。
