翠如表示男友在收拾時睡醒......
黃翠如為食肆活動擔任嘉賓，穿上露肩連身裙亮相，提到超強颱風「山竹」襲港，翠如透露屋企損毀嚴重，家門前大樹被吹斷，半棵樹倒壓在窗前，隨後被磚頭打爆窗戶，屋內即時變得一片狼藉。
翠如笑言：「諗返起都好傻，我哋仲用手Hold住塊玻璃，如果爆就大件事。」她更作出驚人決定，「爆玻璃隔離就係廚房，心諗如果無嘢食就大件事。我入廚房攞包方包出嚟，踎低喺個角落頭度。」
同歷天災，是否可見男友蕭正楠的真性情？翠如直言：「我真係好感謝佢！我揸住包方包瞓著咗，瞓醒嘅時候，見到佢掃緊嘢、執緊嘢。之後就爆住窗咁打邊爐，時間啱啱好。」提及中秋節有另一颱風襲港，問她爆窗是否已處理？翠如謂：「用塊布遮住。（會唔會有人爬到入嚟？）無諗過喎！屋企無貴重嘢，全屋得一包公仔麵。啲人成日話要儲三日兩夜糧，一陣嗌外賣送返屋企先。」
