*

upload_article_image

趙樓神話明年細價樓跌三成 淡友湯文亮都唔敢搭咀

長實樓神趙國雄邀約傳媒老總飯聚,同場還有投資成績亮麗的樓市淡友湯文亮。當中對樓價的議論,成為城中話題。

趙國雄

長實樓神趙國雄(右)及湯文亮(左)。

小鯊無份去食,事後索料,湯文亮特別帶備幾枝1984年的PONTET-CANET紅酒助慶。

湯文亮2015年2月發表《細價樓爆煲論》 ,掀起全城討論,結果細價樓無爆煲,但湯文亮成功出位。

在座有人問趙樓神點睇來年投資前景,趙樓神就話,「三年前湯文亮話細樓會爆煲,我當時唔同意佢,而家我就同意啦。」

趙樓神話,佢地集團早已料到中美貿易戰無可避免為經濟帶來負面影響,情況更會惡化,所以去年便大手沽出住宅新盤套現逾500億元,創歷來紀錄;並預計,明年經濟會較今年更差,料明年樓價可跌25%至30%。

趙樓神對市道有戒心,最主要是覺得樓價已和購買力脫節,而且買家透過借一、二手按揭,槓桿率已偏高。他坦言,來年投資要小心,必須以防守為主,能選擇的唯高息股而已。

對趙樓神的睇淡言論,湯文亮唔敢和應,只是樓市短炒就唔得啦,拉扯談到他最新剛買入荃灣有線電視大廈樓面。他的心得是,投資買樓必須優質,長線收租仍然有得做云云。

呢個飯局的消息出街之後,被視為長實睇淡樓市。昨日有媒體再問趙國雄,他澄清話,相關言論只是針對偏遠地區的納米樓,認為該等單位供應過剩,所以跌幅會較大,可達30%,市區納米樓跌幅則較少。他又重申明年整體住宅樓價跌幅約介乎10%至20%。

無論如何,趙樓神對樓市睇得咁淡,仍然值得關注。

小鯊

** 博客文章文責自負,不代表本公司立場 **