*

upload_article_image

快餐店食客用餐後托盤鋪滿所有枱引熱議

利申:小編有執

到快餐店用餐後,大家會自行清理垃圾嗎?有網民近日在沙田火炭一間連鎖快餐店,發現所有餐枱都幾乎放滿托盤、用過的紙杯、餐具等,遂發帖批評「『唔執嘢』『唔自律』就係香港特色」,引起網民激辯。

快餐店當時食客不多,所有餐枱都放有托盤、用過的紙杯、餐具等。網上圖片

有網民在facebook群組「巴打絲打Facebook Club」上載照片,相中可見當時快餐店內食客不多,所有餐枱都放有托盤、用過的紙杯、餐具等,沒有人清理。樓主留言批評,「唔執嘢」「唔自律』就係香港特色」。

帖文引來大批網民留言,而且意見兩極。大多數人都大罵樓主「道德批判」,反問他「第一日住香港嗎?」、「我有比錢架,奉旨幫你執?」、「你去茶記,酒樓,餐廳食野會唔會自己執?」、「個餐嘅費用包咗清㓗費」,認為「你鍾意自己執你嘅事」。

另有網民認為食客不會自行清理是正常,「因為香港快餐店已經習慣咗有服務,人哋外國嘅快餐店習慣咗自己執,其實係文化差異,你又唔可以話人哋唔啱嘅」、「執係美德,唔執係正常」、「其他人唔執唔代表其他人都有錯」;有網民則試過自己清理後,「個員工阿姐叫我唔好執,比經理見到佢會比人閙」,所以認為這現象與自律無關,甚至有人相信「太自律很多人失業」。

有網民則主張自行丟棄自己用過餐具,「因為會有其他人坐,講真...清潔姐姐做得幾多,咪當幫輕下又唔使令到下一位要坐嘅人麻煩」,亦有人批評,「香港人係自私嫁啦,執個盤都要同你計到盡呀」。