*

upload_article_image

囝囝拒分享心愛玩具給陌生人 竟遭對方嘲諷港媽嬲爆

網民:不如你又拿副身家出來分享?

唔少家長都有帶小朋友公園玩,通常小朋友都會拎埋玩具去玩,不過如果有個陌生家長問你嘅小朋友拎玩具玩,你會唔會借?日前Facebook群組「生仔要考牌系列」一名港媽開po抱怨遇到極厚面皮嘅怪獸家長,要求囝囝將玩具電動車借畀佢小朋友玩,當囝囝拒絕時,反遭該家長冷嘲熱諷,話「人哋唔分享都冇辦法㗎!」

資料圖片

該出po嘅港媽指嗰架玩具電動車,早幾個月前係老爺奶奶買畀囝囝嘅生日禮物,佢叉足電第一次持落街俾囝囝玩,玩嘅期間都有好多家長同小朋友經過望住,但都無小朋友走埋嚟,只係遠望。但有一對經過既母子拖住小朋友行埋嚟,當時架車郁緊,所以佢就提示小心,唔好行咁貼,怕撞到嗰對母子。

然後港媽就聽到對方兒子話好想玩,就直接走去同港媽個囝囝講「畀佢玩」,囝囝即時拒絕,該小朋友聽到就扭計,喺度喊話好想玩,小朋友媽媽就再次同囝囝講「點解呀?佢好想玩呀!你借比佢玩唔得咩?」,囝囝再次拒絕,小朋友聽到就喊得更大聲,然後該家長就好大聲話「人哋唔分享都冇辦法㗎!」,港媽話好似係講埋畀佢聽咁。

港媽又指,對於認識嘅小朋友,囝囝好樂意一齊玩,唔介意借。「架車係屬於我地自己私伙嘅,就算我仔唔肯借我都唔會話佢!同你又三九唔識七!」。

網民亦留言表示支持港媽,稱「濫用分享」;有網民認為,應該先有禮貌咁問咗對方家長,然後先再問小朋友會好啲,唔好咁「老奉」:「唔關乎價值, 要借人嘢玩就係咁架啦」;亦有網民戲言「叫嗰個媽媽分享佢副身家俾你嘛」、「Share個銀包先講喇」。