*

51歲老婆陀B曾大量出血 黃澤鋒:不會放棄天賜禮物

希望一切順利!

現年51歲的前TVB藝人黃澤鋒跟51歲太太陳麗麗(2月22日才52歲)結婚9年,太太在自然受孕下懷孕13周。黃太屬超高齡產婦,她坦言陀B真係搵命博,自爆懷孕第2個月時幾乎大小不保,情況一度好危險。好彩BB夠硬淨,一個月後回復正常,兩公婆先至鬆咗一口氣。日前中午,黃太拖住老公去了中環中建大廈看醫生,希望Keep住睇醫生做檢查,好好保護個BB。

拖實老公 ■帶上口罩的黃太拖實老公慢慢行,醫生說她還沒在穩定期,暫時不可以用力。

黃太說:「因為陀B早期出過豬紅般血塊,胎位受血塊影響偏移子宮頸,如果唔及時移返好中心位置,到胎兒愈嚟愈膨脹時,有機會逼爆變內出血,到時大量失血連大人都有生命危險,好彩BB夠硬淨,一個月後回復正常,兩公婆先至鬆咗一口氣。」不過,大肚婆要keep住私下看醫生做掃瞄,BB未出世就花了一大筆。

拜訪名醫 ■到中環看專科名醫,老來得子,兩公婆顯得好緊張。

提到幾乎陀B不穩,黃太猶有餘悸:「決定公開喜訊前一周凌晨12點突然流出大量鮮血,情況就好似女人嚟M咁,兩小時後再去廁所,見到成個馬桶都係血水,仲不停咁滴出嚟,當時真係好驚,不知所措,拍醒黃澤鋒商量,佢好鎮定咁打畀家庭醫生問意見,可幸我個肚冇痛,醫生建議我先臥牀,第二朝馬上搵佢跟進。」

小心飲食 ■看完醫生,澤鋒同老婆去附近食嘢醫肚,大肚婆點了個熱辣辣的雞批及熱菊花茶。

雖然第二朝依然流出啡色分泌物,好彩只係胎下神經線爆咗微絲血管,對個胎無任何影響,可能嗰晚我冇掩住個肚咳咗兩聲,加上教拳時轉咗個身示範畀學生睇,原來大肚婆唔可以用腰力,真係廢咗武功,唔可以郁動喇!」黃澤鋒緊張說:「當時我喝佢都喝唔切呀,大肚婆連舉高雙手都唔得,佢家族有糖尿病,好易出現妊娠糖尿病,連果汁都唔飲得。」 

公佈喜訊 ■上周三,胎兒剛滿3個月,兩公婆急不及待在社交平台公佈喜訊。

乙肝帶菌陀B須知

日前中午,患乙型肝炎的黃太拖住老公去了中環中建大廈看醫生,就算花多小小錢都要好好保護個BB,不想它在母體時已受感染。因為排毒不好,皮膚敏感周身痕搞到睡不著的黃太好辛苦:「媽咪嗰一代唔識,所以我一出世就係乙肝帶菌者,乙肝會引致肝癌同肝硬化,醫生話懷孕期間酵素會提升,一定要配合藥物治療等肝酵素回復正常水平BB先安全,所以要定期抽血檢查。」

黃澤鋒坦言BB未出世,看私家醫生、接受一系列檢查經已用了好多錢,正所謂大人不吃,小的也要吃,我現在什麼都做,賺奶粉錢,他笑說:「我冇400萬,但樂觀啲睇,啲人話小朋友會帶來財富,我相信將來會有,但現階段先帶畀我哋無限快樂。」 

中過空寶 ■黃澤鋒抱住人哋BB嗒晒糖,原來兩公婆試過中空寶。

網上好多刻薄留言

黃太承認超高齡陀B很辛苦,最慘還被一些惡毒、不負責任網民留言詛咒,話這麼老還生,生嚟攞政府福利,甚至話小心有唐氏綜合症,她說:「可以抨擊大人,但唔好傷及小朋友,好彩網上仲有好多鼓勵嘅說話,真係人間有情。自從早兩年親如子女嘅貓狗陸續離開,我哋兩公婆真係好難過,估唔到上天可以送我一份咁好嘅禮物,我見BB只得兩個月,手腳就識得fing,呢啲通常要3個月先做得到,所以點解唔好好保護佢?我哋家庭計劃生豬BB係deadline,因為豬羊生肖好夾,決定盡地一煲。」黃澤鋒即沒好氣說:「攞4000蚊都咁難,到時都唔知仲有乜社會福利啦。」

日夜開工 ■黃澤鋒早上教游水,晚上教拳,為頭家日夜做到沒有停手,還要湊埋老婆,攰到爆。

此事引來全城關注,提議黃澤鋒提供秘岌畀57歲劉德華及52歲劉太再努力加油,對此,黃澤鋒大笑說:「華仔係我師兄嚟㗎,佢咁fit唔使啦,要嚟個天都擋唔住。」準爸爸黃澤鋒坦言老婆大肚係一個好好嘅學習過程,「絕對訓練到EQ同心理質素,我仲要理陳大小姐脾氣,我諗我有產前抑鬱症多過佢。」

鐵樹開花 ■家中兩棵鐵樹同期突然開花,係好兆頭。

Keep住曝光 ■黃澤鋒自言什麼都撈狂賺奶粉錢,之前跟惠英紅拍網劇《心冤》,保持曝光率。