*

upload_article_image

《荷里活》扮衰人 湯鎮業想「五虎」合體鬥戲

湯哥話咁先夠挑戰性喎!

王晶監製,由鄭則仕、湯鎮業(湯哥)、秦沛等老戲骨主演的無線新劇《荷里活有個大老千》接棒《大帥哥》播出,湯鎮業飾演嘅華探長文雄戲份重,除咗逼「龍四」Ken哥坐監外,仲將其女友「百合」張慧儀私有化做二奶,簡直奸到出汁。60歲的湯哥表示想同前「無線五虎將」中的黃日華和苗僑偉攜手拍劇,夠晒挑戰性喎!

新劇中,湯哥左擁右抱,好風流。

新劇《荷里活》中,康華跟湯哥首次合作,原先同時期她有賺錢job,但為了同兒時偶像合作,竟然嫌錢腥推劇:「佢係我男神,經典作品《香城浪子》等超吸引,當年佢嘅海報我貼滿牀頭,所以開工第一日已好開心。不過,呢個前輩有小小嚴肅同霸氣,初頭識佢都有小小驚,後來發覺佢係個大好人,見佢真心對訓練班學員好好,仲教埋點講對白搶戲,演技更加冇得頂啦。」湯哥聞言笑說:「O依家拍戲冇得揸流灘啦,所以中、港、台觀眾都鍾意睇有戲味演員,內地叫我老戲骨,秦沛呢啲叫『骨灰級』!」

如果湯哥跟黃日華(左)、苗僑偉(左二)、劉德華(右)合體拍戲,卡士超強呀!

想「五虎」埋班

問到可會多拍港劇?湯哥一口say no:「哈!今次做得好奸,太乞人憎喇,所以要快快離開!其實主要係時間問題,留港拍劇幾個月TVB畀唔起錢,條數計落唔划算,除非昔日五虎同黃日華、苗僑偉合體就另議,以前佢哋個個靚仔,O依家大家都成熟壓到場,可以齊齊鬥戲,係個挑戰,又有新鮮感同噱頭,比如拍部講恩怨情仇,搵埋小鮮肉做仔,阿苗有Bosco,咁我搵吳卓羲都可以,佢有小小奸奸哋,但我兩個仔啲戲未得。如果TVB肯,我咪肯拍囉!或者可以做吓舞台劇,我八期訓練班;黃日華第九期;華仔(劉德華)係十期,不如做個《八九不離十》,華仔客串吓都唔錯,反而偉仔(梁朝偉)唔埋堆,一直少聯絡。」

康華跟偶像湯鎮業首度合作,大讚對方好識照顧人,又夠專一。

湯鎮業好率直,坦言兩個孖仔演技未得,只可以做學生。

新劇中,湯哥左擁右抱,好風流。

湯哥逼張慧儀做二奶,又強吻她,奸到出汁。

拍內地劇密密掘金的湯哥,同第二任太太鄒文靜育有一對10歲孖女。