*

upload_article_image

認康復後仍有後遺症 張達明感激靚靚古仔助拍新戲 

佢話現在會對自己、身邊人好啲,爭取愉快每一天!

由張達明、吳鎮宇、袁詠儀及古天樂等主演的賀歲片《家和萬事驚》是張達明患癌康復後首任編監演的電影,拍攝時雖抱病開工好吃力,但難得遇到有挑戰性的好機會。他亦很感激靚靚、古天樂及吳鎮宇相助,令套戲可以順利開拍!

達明最大心願就是同兩個偶像拍戲,但唔可以透露對方是誰。

電影改編自1993年由張達明編劇、曾獲香港演藝發展局「傑出創作劇本大獎」公開組冠軍的《亞DUM一家看海的日子》。故事講述香港的居住問題,主角用上所有積蓄,再加上父親的棺材本,付了首期買了一個海景單位,三代人本因為窗外的海景得到慰藉,但一天突然有巨型廣告牌擋着景觀,自此一家五口變得家無寧日,千方百計要令廣告牌消失。達明決心將舞台劇搬上大銀幕,加上香港已連續8年成為全世界供樓最困難的城市,香港人對房屋問題一定好有共鳴。

張達明坦言有場戲講他在輪椅度撐起身行,絕對是真實經歷:「因為病過,先知道坐輪椅會腳痹,企起身時邊度運力要多啲,單靠幻想係演唔到咁有真實性。」 

去年,張達明獲得第24屆華鼎中國百強電視劇頒發的「觀眾最喜愛影視明星」獎。

感激男女主角幫忙

達明感激靚靚、古天樂及吳鎮宇相助,尤其鎮宇即使沒空,都話要抽空幫手拍了先,由他帶頭支持做男主角,部戲開得成機會就好大,接下來的就易辦事得多。而且古仔連反派都肯演更難得,終於發覺香港電影圈有好多好有愛心的朋友。康復後身兼三職的達明坦言好吃力,因為將20年前舞台劇變身現代版絕對不容易。談到目前身體狀況,達明不想多談:「盡量唔想講,係有後遺症,未知狀態,時好時唔好。(病後對將來人生、工作有乜啟發?)梗係對自己、身邊人好啲,爭取愉快每一天,但愉快每一天唔係自己愉快,係身邊每個朋友都美麗愉快,對方嘅笑同能量會再慢慢畀番你。」

片中一臉病容的達明演阿伯,還要化特技妝。

有靚靚、鎮宇相助,加埋新晉演員吳肇軒及蔡頌思飾演子孫。

達明有跟發哥行山同埋跑步。

達明剛和城城拍完新片《麥路人》。