*

阿伯搭巴士無揚手敲車門 車長提醒掀連場罵戰

最終令全車人轉乘另一輛巴士......

一般人截巴士會揚手示意,但有大叔沒有按正常做法,見巴士埋站後未有開車門,就拍車門示意,結果被車長提醒「唔係敲玻璃架」、「玻璃爛咗點計呀」。頓時惹怒大叔大鬧,車長就氣定神閒向公司匯報。有被耽誤乘客不滿大叔阻礙全車,怒罵「好X麻煩呀!」,展開另一場舌戰。有關片段在網上廣傳,有網民認為雙方都有錯,並指敲車門其實是小事,「車長反應大咗啲,為啖氣阻住成車人」,但亦有不少人斥大叔行為,「截的士小巴唔好遞手,敲門啦」。

車長提醒大叔截車「唔係敲玻璃」後,雙方引起爭執。影片截圖

有網民昨在facebook群組「巴士的事討論區」上載兩段巴士車Cam片段,事發是前晚(19日)7時許,其中一段可見一輛九巴駛至元朗大棠路車站時,當時沒有乘客揚手截車,巴士疑因此未有開車門,在巴士站的一名大叔遂拍車門示意。

大叔候車時未有遞手截車。影片截圖

大叔上車後,被車長提醒「唔係敲玻璃架」。大叔聞言不滿,反問車長:「哥哥,你唔開門,我企定定架喎,我敲門咋喎,咁都唔啱?」車長回答道:「梗係唔啱啦!玻璃爛咗點計呀?」並稱「你唔遞手點知你上車」。大叔則重申「你唔開門我咪敲門」,又說:「唔好揸吖!」、「我可以打啲話報公司,打電話報3條9」、「睇下邊個唔啱,睇下邊個衰」。車長此時亦致電向公司匯報。

因截車無揚手,竟掀起連場罵戰。影片截圖

最終乘客需轉搭另一輛巴士,有女乘客落車前不滿大叔所為:「好心你啦!阻住成車啲人」,大叔隨即反擊「我無阻喎!」另有女乘客要求大叔退還車費,好讓她轉乘另一巴士,大叔不服,堅稱是車長沒有開車門引起,女乘客大怒「佢而家咪開咗畀你囉!你咪入咗嚟囉!」有男乘客亦喝罵大叔:「好X麻煩呀!你啲老嘢」。

影片截圖

片段其後在fb多個群組轉載,有網民留言表示,「遞手搭巴士係常識嚟」、「上車遞手唔係唔識吖嘛。唔係敲門上車喎。你搭的士搭小巴會唔會敲門先上車吖?」、「乘客遞手,巴士司機一定要埋站,不過唔遞手嘅話,司機有權唔show你」,另有乘客指車門玻璃碎裂時有發生,「現在巴士的玻璃很化學,在早前就有一乘客敲玻璃門,整塊就碎了。」

不過,亦有網民批評車長是「為啖氣,小題大做」、「個司機反應大咗」、「根本係小事!司機唔報上去 咪冇事囉!可以繼續開車!」。