*

惡婦入一堆「神沙」被勸爆粗罵人 車長:入1萬都當兩元

低過$1面值的硬幣唔可以俾多過$2~

資料圖片

雖然普遍市民搭車都會使用八達通,但如果以現金付車資的話,應注意 《硬幣條例》。有婦人近日乘搭過海巴士時,就被車長發現投入大堆毫子,於是被要求補入車資,令婦人大為不滿,在車上大吵大鬧,更用粗口大罵車長。車長則強調是硬幣條例規定,「你入一萬元神沙我都係當你兩元」,婦人最終屈服補回車資,但事件已惹引不少網民熱議。

資料圖片

有網民在facebook群組「馬路的事討論區」發帖,稱「阿婆你入一大堆神沙自己樣衰咪算囉!仲要死撐,一句唔知就大晒」。帖文附有一段長逾7分鐘片段,可見一名婦人上車投入一堆用小盒盛載的零錢後,車長隨即表示:「你咁樣我當你入咗兩元」;婦人反問「點解呀?」,車長則以 《硬幣條例》作解釋,指對方所投入的全是「神沙」,條例保障下只能當投入兩元,並要求婦人補回7.3元車資。

網上圖片

婦人繼續辯稱自己不知情,但車長亦堅持跟足條例,「全部一毫兩毫倒落去,我睇唔到呀,我點數呀?《硬幣條例》就係(限制)神沙(數量)」,就算「你唔知,唔知代表咩架,有法例喺度架嘛」、「你入一萬元神沙我都係當你兩元」。婦人聞言不耐煩地示意車長收聲,「唔使講咁多」、「$7.3咪$7.3囉」、「人哋都唔會好似你咁架」。

她其後走到車廂找零錢時,仍不斷表示「唔知」,又怪責車長「睇住人哋數住都唔講」。即使她最後再補入車資,也不忘用粗口罵車長,雙方一度發生口角。在場亦有不少乘客勸喻婦人已有條例「白字黑字無得撐,唔使拗」。

網上圖片

片段引來不少網民討論,有網民認為婦人過份,「咁多(神沙)叫人點數」、「毫子最多夾埋兩蚊,唔犯法,多過兩蚊,報警喇唔該」、「唔畀足錢,車長有權趕佢落車」、「司機跟例無錯,人情唔理係另一件事」。

根據《硬幣條例》,法定貨幣以面額不少於$1的硬幣而言,所支付的款額不超逾$100;而以面額少於$1的硬幣而言,所支付的款額不超逾$2。