*

林峯細說古天樂18年「恩怨」

林峯:「古仔係我老闆嚟,好多嘢向古生學習。」

最近林峯高調回歸TVB兼會同星夢娛樂合作,拍劇、唱主題曲雙管齊下,另外在新片《P風暴》中更首度演奸角,與古天樂和鄭嘉穎等有埋身肉搏,好多新嘗試。林峯一臉滿足地說:「多謝古生(老闆古天樂)畀機會我挑戰自己,其實我想做奸角好耐。」他又細說和古天樂糾纏了多年的「恩怨」。

相隔5年,林峯強勢回歸「娘家」TVB。

林峯雖然進軍影壇,但絕對唔會放棄唱歌同拍劇。

對於首次做反派,林峯坦言有點吃力,「因為唔會用太多篇幅交代人物背景,所以要盡快令觀眾代入,感覺會比較外露,畀到人有威脅性,故好多場戲力度放得盡小小,尤其係動作,但又唔可以太over,我好怕將心底累積多年嘅奸一次過爆發,會過咗火位睇落會唔舒服。哈,我以為係演一個有勢力富二代,會點人行先死先,點知自己要衝住去,比想像中更多動作戲,尤其喺監獄打爛仔交,少不免有碰撞同損傷。」

林峯演繹監犯入型入格。

談到拍《P風暴》最難忘的事,林峯話絕對是18年後再同古天樂合作,有另一種火花及默契:「古生教我好多嘢,始終電影我接觸比較少,一開始怕我唔熟習,佢教我演繹上節奏,等我盡快投入。遲啲我哋合作拍電影版《尋秦記》,呢次算係熱身。」

在新片中,林峯同周秀娜有埋身肉搏戲份。

當年林峯被指是古天樂接班人,又指當年二人拍《尋秦記》時鬧不和,他拆解「恩怨」說:「呢啲係報道一貫手法,唔係拍拖就不和㗎啦,我好記得當日喺廠,我同古生同時睇報道再相視而笑。時至今日我哋冇舊事重提,咁老土,而且演員之間唔覺係一回事,(當年有記者認錯你係古仔喎!)哈!係好好笑,可能個記者新入行,我當年曬到太黑,驟眼以為係古仔,呢個係笑話,不值一提。(家陣兩人都可以獨當一面!)唔好咁講,古仔係我老闆嚟,好多嘢向古生學習。」

2001年,當年有傳古仔同林峯拍《尋秦記》時不和。

對於跟古天樂曾傳不和,林峯覺得係笑料一則。

林峯講明唔再提感情事,所以不肯再回應和張馨月的婚訊傳聞。