人生有幾多個10年？中環人有唔少喜歡打高球，人人都識得老虎活士Tiger Woods ，活士上次贏得Major大滿貫錦標冠軍已是2008年US Open美國公開賽，已是11年之前。他之後人生由天堂跌至谷底，經歷喪父、性上癮、撞車、離婚、受傷、失去揮桿感覺、caddie反面閙佢係asshole、sponsor 贊助商紛紛離去、醉駕被關在監獄渡過4小時、2016年7月世界排名下跌至605位！
尚風身邊的球友們過去一直認為，Tiger Woods 再不可能贏得任何冠軍，認同He is done! 尚風打高球就係睇住Tiger Woods大嘅，睇見偶像咁樣沒落，真係好難受，連睇PGA賽事嘅興趣都大減。
活士奇績翻生。AP圖片
誰知呢個世界真係有奇蹟，傳奇就在近兩年內逐步發生！2017年Tiger傷愈復出、成功轉揮桿swing（不再只是追求力量及轉身，改為以控制球向為目標）、識番個女朋友，一切回復正常。2018年終於贏出一關巡迴賽，昨天（4月14日）則神奇地再嬴Major。睇見佢贏完之後，同母親、一對仔女、女朋友擁抱，真係戥佢開心。佢響18洞推最後一桿的時候，我估起碼有成一萬人圍住個果嶺，見證佢神奇地復活，尚風捱到零晨三點睇完直播，也是值得的。
講開復活，在金融世界內，衰咗更難復活。最傳奇當然係蘋果Apple始創人之一Steve Jobs喬布斯。他1985年，在蘋果董事會的鬥爭失勢後離開，成立了NeXT，也是11年後的1996年，蘋果買下NeXT，喬貝斯重任CEO，並將正在垂死邊緣的蘋果，起死回生！
不過，在香港就找不到類似例子，2000年科網股泡沫，短暫的風光造就了多少科網股的盛衰，像當年的Hong Kong.com，已經消失，仍然生存下來的，有新鴻基地產屬下的新意網（1686），當年自高位急插，近年已轉型為數據中心，股價由2012年1元低位，升至現時6.9元，市値去番160億元。但仍然遠不如2000年時的市值。
新意網（1686）過去兩年股價。
粗略計算，新意網2000年以10.38元招股上市，2010年曾一送一紅股，如買入新股一直持有，成本5.19元，多年來共獲派股息約2.89元，以現價6.9元計，持貨19年，都唔算好好回報，但至少有番啲渣。不過如果在新意網高位時買入，而家仲遠遠未返家鄉。至於買咗其他香港科網股，就更加喊得一句句啦。
尚風
** 博客文章文責自負,不代表本公司立場 **