*

upload_article_image

傳緋聞後合作無尷尬 陳瀅感激陳家樂勁好口

Jeannie:「我都唔知點讚番佢好添!」

陳瀅(Jeannie)最近首次在周六播出的劇集《廉政行動2019》擔正,雖然該劇只得五集,但她一樣好開心,又透露演短劇也有難度,幸好遇着好拍檔陳家樂,大家互相幫助。對於家樂讚她是「貼地女神」,較易惹緋聞,又話她演戲天份高,她好感激對方的讚賞,笑言不知如何稱讚對方好,更強調緋聞後兩人合作無尷尬。

對於家樂讚演戲天份高,陳瀅解釋:「可能我理解力唔錯,容易明白導演要求。」

Jeannie話《廉》劇雖只有五集,但拍足四個月,證明是慢功出細貨之作,由於故事內容橫跨10年,令她演起來有一定難度,「內容有講咁長,但要用五集交代,所以角色都要有小小成長,但拍攝唔係順時序,有時都會搞到好亂。」

難得同鄭則仕合作,陳瀅認為是偷師好機會。

Jeannie又指有好拍檔陳家樂令拍攝更順利,「我中文唔好,有啲條例讀極都唔順,好彩家樂會教點講會順啲,而我就會幫番佢讀英文對白。」她又好開心有機會跟前輩鄭則仕合作,「佢會成日提點我哋㗎!不過第一日見佢,佢話我做得好咗,我幾驚同佢合作過唔記得,即刻上網搵,但原來佢有睇我之前啲劇。」

劇中陳瀅和家樂做廉署調查員,拍住上齊齊查案。

談到家樂讚她是「貼地女神」,還是演戲天份,Jeannie坦承好感激對方,「讚我咁多嘢,我都唔知點讚番佢好添!我同佢真係冇嘢,大家再合作都唔會尷尬,可能佢容易面紅,搞到我哋好似有啲嘢咁。其實我唔會為避緋聞影響工作,好似今次同家樂要有拍檔嘅默契,就會照樣同佢熟絡,避忌會睇情況囉!」

陳瀅和家樂傳緋聞後,被拍得開工時笑得勁甜。

提到《福爾摩師奶》演技被讚,令陳瀅對未來演出打了支強心針。

陳瀅拍完劇集《黃金有罪》將會小休,期間會到夏威夷出席朋友婚禮,到時少不免會穿水着。

陳瀅早前在加拿大買樓送給婆婆,現在要努力搵錢供樓。