作者:金多寶
命運相似嘅人，總會聚集埋一齊。四年前認識一對母女，其時亦都係我金多寶最霉嘅歲月。佢地住响葵涌村P葵樓一個中層單位，我就時常响佢地對面個單位出入，佢地誤以為我係住客。有一晚，我地响電梯相遇。「你係住我對面果個！」我只係笑住打招呼，點知佢地下一句就好緊張咁問：「你屋企係咪有鬼呀？」嘩！屌！點呀？「點解你地會知呀！？」我咁答，佢地就開始驚叫，拉我出電梯。唔係窮到冇錢交租，都唔想幫人看屋而出入呢條奇怪屋村...
話說，幫人看屋嘅第二個星期，有晚打開木門想通下風，忽然一道好凍好凍嘅風，由大門吹左入廁所方向。自此之後，當我响廚房洗碗，就會聽到一對中港夫妻嘈交，內容晚晚差唔多，結尾都係一句「我死左佢算啦！」係囉，點解晚晚講啲野都一樣？我當時冇留意；沖涼時又會聽到廚房有人搞筷子筒；响廚房時又會聽到客廳有人行路。當時我金多寶持住自己窮，以為自己夠吉士，遇神殺神、遇佛殺佛。最終有一晚，訓落床幾秒，就聽到廚房個雪櫃，不停發出開門閂門聲，約莫聽到第二十三下左右，我頂唔蒲，打比住响同村C葵樓嘅一個男同事「救命呀快啲救我！」好在佢以為我比人入屋行劫九秒九飛上黎營救，佢一上到黎，乜聲都冇。
由電梯行出走廊，佢兩個已經好驚咁扯住我衫䄂，對我講出各自嘅遭遇。個媽媽話見過走廊防火門後有個「男人」面向牆，永遠唔會郁，同時間，咁重嘅防火門，响冇野頂住之下識得半掩；個女就話有晚零晨收工入電梯上樓，貪靚响電梯裏面啲反光鏡板照下自己個look, 明明得佢一個但照倒兩對腳。哈，呢啲故仔嚇唔倒我金多寶嘅！佢個女跟住就話：「有晚我見倒有個男人穿牆入左你屋企。」果刻，我真係驚到仆街，心臟都戚左一下。我大門隔離個位置，穿入去咪就係廚房囉！？呢條村究竟咩料？我入左個咩世界？果晚慘呀，我開晒全屋嘅燈，硬住頭皮沖涼，又唔敢訓，第二朝仲要番工架。
到左冬天，呢條村啲風，晚晚吹到嗚嗚聲，大聲到好誇張，同時啲聲又有啲似人扮咁，好鬼特別。恐怖在線果位七師傅話齋「間屋大風一定有鬼」我信呀！邊止我間屋？成個山頭都吹到嗚嗚聲，真係好痴線！呢條真係條鬼村。到左夏天，有日我放假，偷偷攞張床單放响樓下啲圍欄度晒太陽時，識左啲私奶，講起年初二P葵樓單空中飛人（上左蘋果新聞），佢地就話「有乜咁恐怖？L葵樓先勁呀，長期有啲唔係住果度嘅人（非本村），走去果度十一樓吊頸架。」吓？點解要咁做？「果度好似有一種吸力，引啲想死嘅人過去架。」斃家伙，有日我買完零食番上P葵樓，唔知咩事開唔倒門鎖，望多兩眼，度門都唔同左樣，原來我上錯左L葵樓。咦？點解會上錯嘅？前後試過兩次，唔通果陣我磁場低到咁？
搬走左咁多年，今日屎忽痕上網一查，條村啲case電話簿咁厚，我心諗：邊止咁少吖。果條村的確係好潮濕、好大風、好多人特登去果度尋短見、亦好多社會問題、倫常案件，我唔識風水，只覺得果度個氣塲奇奇怪怪，空氣凝重，集結左好多怨氣揮之不去咁。唔知有冇人又知道呢條村啲故仔呢？
香港兔蘆術數學會
** 博客文章文責自負,不代表本公司立場 **