美國延遲90日封殺華為，意義不大，隔晚美國道指回升197點，納指回升83點，但港股相對弱，今日無乜反應，觀望氣氛極濃，恆指受制27800點，最終升48點至27705點，成交少得可憐，只得763億元。上証綜指又跌14點至2891點，有人話亞爺想造返上3000點維穏，尚風覺得唔好信，因為政治市，市場力量大於人為干預，太大力托到A股咁高無乜用。
尚風問過基金經理老友，佢話在恆指三萬點時已沽出三份一貨獲利，論點就係：「舊年貿易戰爆發時，恆指跌勢正式由跌破29,000點開始，最低見24500點，上兩個月好樂觀咁認為中美會傾掂數，但係指數已經升凸到30,000點之上，唔係好合理，所以適量地減磅！」
但係基金經理唔可以揸咁多現金，因為始終係港股基金，唯有將沽咗貨嘅錢繼續買入防守性股份，好似領展、煤氣，同埋公用股。本來諗住28000開始買返貨，誰知侵侵突然變臉，宜家中美貿易戰嘅環境，對咁多中國貨品徵稅，仲衰過舊年，在這種環境好難買貨，否則輸咗錢點向老細交代。
消息指美國正在將包括海康威視及浙江大華在內的多達5家中國公司列入黑名單，禁止佢地使用美國的部件或軟件，貿易戰隱約發展成科技之戰，基金經理無辦法唔小心！今年港股五窮六絕機會大，市場要等待6月29日在日本大阪舉行的G20峰會，到時如果習特真係見面，才可能有轉機。
人民幣七算頂咗好耐，唔可以穿！如果穿咗，就係2008年以來新低。
咁短期來講，個市會點走，芬佬朋友都係叫睇實個匯市，睇住啲資金流向，如果境外人民幣跌破七算，資金隨時由新興市場流去美國，到時中港股市又會再大插。
韓圜今年累跌6.6%。
如今成個亞洲，除了日圓因為避險作用而企硬外，其他亞洲貨幣都好弱，若亞幣全面走弱，資金流出亞洲，港股更加無運行。以韓圜為例，韓圜係今年亞洲表現最差的貨幣，今年至今累計貶值6.6%，僅僅5月，跌幅已超過2%。
中美貿易戰令韓國成為了最新受影響的地區，因為韓國高度依賴於高科技電子零件的出口，半導體出口佔到了韓國出口量20%，中國是韓國半導體大買家。若貿易戰影響中國，減少落單，韓國受損好大。
韓圜現時跌至1200，要守住1240，若守不住，便是九年新低，還要破位向下。隨着韓圜的下跌，韓國當局也愈發頻繁地表態支持匯價，韓國財政部和韓國央行至少8次警告市場，不要沽空韓圜，而且語氣也變得更加尖銳。整個亞洲匯市，開始有點前期的災味。
尚風
** 博客文章文責自負,不代表本公司立場 **