遠赴芬蘭拍MV 鄧小巧極速72小時完成新歌

新歌《精神餵飼》由作曲、填詞、編曲到完成錄音，僅花了72小時。

鄧小巧早前與音樂監製兼創作人馮穎琪、謝國維、藍奕邦和MV導演Sheng等飛往芬蘭，會合當地監製Leo Jupiter，展開一連10天創作之旅。其中新歌《精神餵飼》，由作曲、填詞、編曲到完成錄音，僅花了72小時，連MV都在芬蘭取景，百份百「Made in Finland」。

網上圖片

被譽為「治癒系歌手」的小巧，決定挑戰自我，在音樂路上開創更多可能性，在三月推出唱片《No concidence》後，拒絕休息放假，隨即與創作團隊出發芬蘭，為下張唱片炮製新歌，成功花三天完成了《精神餵飼》，更完全顛覆過往小巧的音樂風格，創造了另一個她。

鄧小巧成功花3天完成新歌《精神餵飼》。

小巧說：「可能真係身在外地，創作靈感特別多，被當地生活文化衝擊，加上當地監製Leo Jupiter，同埋我本身嘅創作班底馮穎琪、謝國維、藍奕邦，連埋我五個人困喺錄音室一齊作曲、填詞、編曲和錄音，無論音樂聲、我主唱把聲同埋和音都一次過3天搞掂晒，第四日就拍埋MV，一氣呵成，好攰但好刺激，好滿足。同Leo合作好多火花，佢有好多新諗法，放埋一齊好得意！」《精神餵飼》歌詞反映現在很多人依賴上網，瀏覽不同平台去「養活」他們的「精神」，有人喜歡留言批評，同時亦有好多人渴望批評而獲存在感。

鄧小巧早前與馮穎琪、謝國維、藍奕邦等展開一連10天創作之旅。

首次在芬蘭拍MV，小巧穿梭芬蘭大街小巷、特色廣場、地鐵站、月台、列車、碼頭和公園，「今次我哋喺芬蘭去咗好多地方拍MV，喺地鐵站、碼頭、好有趣嘅廣場取景，周圍拍嘢都無乜人理我哋，好多空間，申請手續又唔複雜，好舒服。」

小巧穿梭芬蘭大街小巷及地鐵站拍MV。

鏡頭前衣衫單薄好瀟灑，事實上小巧被大雨和風雪吹到手腳僵硬，就算穿羽絨又披毛毯都頂不住，工作人員爭相擁抱為她人肉取暖。小巧笑說：「每次嗌Roll機就落雨、落雪，仲特別大風，一停機就出太陽，唔通芬蘭唔鍾意我？」話雖如此，但她沒有被打擊，揚言繼續歐洲創作之旅，下站希望到瑞典和丹麥。

小巧被大雨和風雪吹到手腳僵硬。

連詩雅：「我過咗嗰個『嫩』啦！」

由鄧小巧主理的網上歌唱節目《Singaholic》來到第五集，今集請來剛宣佈造人成功的連詩雅（Shiga）任嘉賓，由於是宣佈有喜後首個歌唱及訪談節目，期間二人大談生仔經及新婚話題。小巧更謂Shiga是首位現身節目的人妻嘉賓，「可以陪我一齊傾人妻話題。」

連詩雅（Shiga）為鄧小巧主理的網上歌唱節目擔任嘉賓。

由於二人均是新婚，所以話題總離不開婚姻生活、跟另一半的相處。小巧問Shiga最「唔掂」老公陳家樂甚麼事，Shiga第一樣便是投訴他不洗碗，「係唯一一樣要投訴。但我要澄清雖然佢唔洗碗，但因為我都唔洗衫，哈哈，所以佢負責洗廁所、洗衫呢啲清潔部門，但廚房入面所有嘢就係我負責。」而小巧則最頂唔順老公狂食西餐，Shiga憶述有次在家中問小巧想吃甚麼，她第一句便是「總之唔好西餐就得」，小巧隨即向Shiga大呻苦況，「以前冬天好鍾意招呼啲朋友嚟我屋企打邊爐，我今年係一次喺屋企打邊爐嘅經驗都冇！因為佢憎打邊爐，佢問why？『點解你哋可以煎、炒或者燒啲嘢，點解你哋要烚熟佢呢？』我哋打邊爐成日都會有啲骨、海鮮等各樣，雞腳嗰啲佢話：『點解一塊牛扒同雞腳面前你會揀雞腳？』我真係解釋唔到，因為我真係會揀雞腳！我話啲皮索晒啲汁又炆到好腍，食完個嘴又張住有膠質，我覺得好正！」

Shiga宣佈有喜後首次上節目。

Shiga笑言婚後每次見到親朋戚友時，第一句說話就是「幾時生仔？」

至於生仔，即將成為母親的Shiga表示婚後每次見到親朋戚友時的第一句說話就是「幾時生仔？」小巧即謂：「個個都話有仔趁嫩生。」Shiga即笑謂：「我過咗嗰個『嫩』啦，哈哈。其實我係一個幾大唔透嘅細路嚟嘅，不過有啲人生咗反而打理得頭家好好，有啲好成熟嘅反而搞唔掂，所以我就話when it comes you”ll be ready. 我嘅心態係隨緣多啲，go with the flow. 」可能因為身份的轉變，當Shiga唱完講述母親的《雲吞》後特別感觸，問到母親做過一件最令她感動的事時，Shiga表示很多，「我係媽咪湊大，佢係經濟支柱，我哋係相依為命，所以……（抹眼淚）以前唱情歌係好觸動到，但原來人去到另一個階段，經歷多咗、人越大、屋企人越嚟越老，要經歷生離死別。我好慶幸我媽媽仲喺我身邊，但因為佢年紀真係比較大，佢四十歲先生我，所以我一路唱呢首歌同埋睇MV嘅時候，我最初好激動唱唔到，歌詞令我覺得好有共鳴。」小巧謂對Shiga一番話特別深刻，「佢話：『我自己窮有乜所謂啫，我要養我阿媽，我自己瞓天橋底都得，但我唔可以俾我阿媽瞓天橋底！』」

小巧提起母親感動事，一開口便已哽咽。

提起母親感動事，小巧一開口便已哽咽，「我阿媽最令我感動嘅係一句說話⋯⋯」她表示步入青春期時，大約是中三，她開始有自己買衫的想法，但被媽媽迫去街市買衫，「我梗係唔高興啦，點揀啫！揀唔到啊！我阿媽嗰次發咗個好大嘅脾氣，覺得點解俾錢我買衫、陪我去買衫，我仲嫌棄啲衫。直至七、八年前，我阿媽突然之間有一日：『女女啊……』佢話：『女女啊，媽咪對唔住你呀……』我阿媽應該係第一次同我講對唔住，佢話：『我都唔明白點解嗰陣會逼你去啲師奶嘅街市買衫呀，真係對你唔住啊。』我係…… 我哋有四兄弟姊妹，佢真係要去做嘢，所以佢不能每一日都見住我哋長大，我覺得佢到一個年紀，佢開始明白我嘅諗法，然後我亦都大個咗，我不斷去同佢講好多我嘅諗法之後，我覺得互相明白咗。其實嗰件事去到咁大個，我一啲都冇嬲啦其實講真句，只不過係阿媽會去邊度買衫佢咪帶我去邊度買衫囉，係咁樣嘅一件事。但係佢嗰句對唔住，我覺得好Powerful。」

Shiga邊聽邊喊埋一份！

邊講邊喊的小巧笑說本想搞喊Shiga，最後卻搞喊自己，坐在旁邊聽的Shiga其實都邊聽邊喊埋一份，「我已經喺屋企喊咗好多次先出嚟，好多謝你有呢首歌。」節目在充滿笑與淚的聲音中結束。