中美貿易戰發展繼續令人撲朔迷離，不過鴻海老闆郭台銘就比較悲觀，認為未來幾個月，甚至未來幾個禮拜，金融市場將會有劇變，有機會發展成為另一個比金融海嘯更大嘅海嘯！
郭台銘係最成功的台灣企業家，在國內生產蘋果及華為手機，對中港台嘅形勢分析，我哋當然要加倍注意。他會擔心貿易戰令到全球產業鏈斷裂，觸發金融風暴。今日亞洲時段，美國杜瓊斯指數期貨再跌150點左右，預料今晚杜指仍會低開。相對來講，上證指數恒指同埋香港恒生指數今日反應平靜，只係微跌咗幾點，可能同近日中國連環出口術及出招，有穩定A股作用有關。
恆指一年圖。
短期來講，上證指數同埋恒生指數有反彈唔奇，但如果怕郭台銘嘅睇法成真，咁可能需要趁反彈嘅時候，部署一D淡倉來做對沖。最簡單來講，可以沽期指，又或者買入近日好多人留意嘅逆向恒指ETF，指數跌佢就升，其中代號7300呢一隻，恆指跌幾多個巴仙，佢就升幾多巴仙。如果想有少少槓桿，可以考慮代號7500呢一隻，恆指跌1%，佢就大概升2%。
至於恒生指數嘅下跌目標係幾多？如果相信係熊市第三期，有分析員就用簡單嘅ABC跌浪來計算，A浪由恆指在2018年1月29日33484點見頂，然後跌至2018年10月29日24594點見底，跌幅8890點，然後係反彈B浪，彈至2019年4月9日30222點，幅度5628點，大約是A浪跌幅的63.3%，極度接近黃金比率61.8%。C浪由30222點開始跌，如果下跌反彈幅度5628點的61.8%，便應下跌3478點至26744點，同今日恆指低點26735點，非常接近，所以如果恒指短期有反彈，係相當合理。
如估貿易戰持續，出現郭台銘講的比較悲觀狀況，至於計算恆指下跌最終目標，就應該用5628點×1.618 ，得出9106點，這就是恆指應該由高位30222點下跌的點數，目標就是21116點！
睇返金融海嘯嘅時候，恆指的確係有ABC跌浪，咁今次如果有更大嘅海嘯，咁樣走完一個完整的ABC跌浪唔出奇。用大摩嘅講法，呢個係悲觀局面，一般估計唔會跌得咁慘，可能出現嘅機會只有兩三成，不過叫人控制風險，唔好咁博，就永遠無錯。
尚風
** 博客文章文責自負,不代表本公司立場 **