曾俊華認為警察在今次修例事件中成為磨心。
政府提出修訂《逃犯條例》,引發多場大規模示威,爭議未有隨特首林鄭月娥宣布暫緩修例而停止。前財政司司長曾俊華昨於社交網站做直播時表示,香港人一般都好斯文,但都擔心一旦暴力出現將帶來仇恨,「好難返轉頭」,呼籲各方小心處理,否則事後才思考解決方法已太遲。
曾俊華認同政府高層製造矛盾,卻將責任推至前綫警員「找數」,令警方於今次爭議中成為磨心,又指以往累積的社會矛盾其實一直存在,「只係呢兩年收埋咗」,認為需要一段長時間,以包容及耐心的態度處理。
修例一役亦令特首林鄭月娥民望插水,坊間似乎開始討論下任特首的可能人選。繼唐英年表態不會選特首後,曾俊華的前政治助理羅永聰亦在直播尾聲,話要幫外國傳媒追問前上司會唔會再參選特首,曾俊華就笑言係「愚蠢嘅問題」,斬釘截鐵話:「答案係兩個字:N、O(不會)。」
另外,前特首曾蔭權昨獲判終極上訴得直,曾俊華亦在直播中祝對方生活愉快,「希望佢可以多啲時間,影多啲靚相畀我哋睇啦﹗」