*

upload_article_image

提議再合作演情侶 陳家樂衛詩雅齊爭苗僑偉

家樂話要同三哥做情侶,詩雅則話要做競爭者,但最終爭輸......

苗僑偉(三哥)與陳家樂和衛詩雅最近在新戲《掃毒2天地對決》中首度合作,戲中三人為掃毒組探員,身為「上司」的三哥被兩位「下屬」大讚,戲裏戲外都好照顧人,詩雅更形容「有三哥冇奔波」;而家樂和詩雅相隔10年再演情侶,連三哥起初都誤會他們是真情侶,三人又笑言下次再合作可演情侶,詩雅更大膽提議同家樂爭三哥。

如果三哥、家樂和詩雅合演情侶,外型上絕對無違和感。

要詩雅和家樂講同三哥合作感受,他們首推三哥的動作戲。詩雅化身小粉絲說:「三哥真係超型,單係開槍唔眨眼,已經好厲害,我哋同導演(邱禮濤)睇片都忍唔住猛話型。」家樂就讚三哥夠體貼,「三哥開工都會萬歲㗎!我哋拍嗰時係夏天,有日竟然有椰青飲!幾正呀!仲試過有深井燒鵝食呀!」詩雅忍唔住爆出一句,「 真係有三哥冇奔波呀!」三哥就好謙咁解釋,開槍唔眨眼,只因功多藝熟;至於萬歲就因他本身都好為食喎!

三哥開槍唔眨眼絕技,大家睇戲時不妨留意吓。

家樂和詩雅開槍經驗少,所以現場不停向三哥偷師。

講到同兩後輩合作,三哥話:「好輕易投入到,唔使再磨合,佢哋都好敬業值得讚嘅。」談到家樂和詩雅再演情侶,三哥竟爆話:「我最初以為佢哋真係拍拖,佢哋又登對,戲裏戲外都係咁相處,現實生活排緊戲咁。」

三哥坦承難得跟劉德華和古天樂合作,相當享受拍攝過程。

劇中家樂和詩雅演一對,兩人都話熟絡演起來更有默契。

兩人就話熟絡會更有默契,家樂說:「好似有場雪房戲,劇本冇寫到咁細,凍我咪除件衫畀佢。」三哥踢爆現場其實好熱,家樂即自爆,「所以我咪除衫畀佢囉!」詩雅即反駁,「所以我初初係拒絕佢㗎!」三人仲話唔夠喉想再合作,最初三哥提議做二人爸爸,家樂卻話:「不如做情侶,我同三哥一對!」詩雅再謂,「我哋爭三哥,我仲爭輸咗呀!」

三人講起拍攝情況,大家滔滔不絕。