*

upload_article_image

黃疸指數急升 黃澤鋒夫婦心痛愛女捱針桔

B女無事父母最放心。

52歲的黃澤鋒本月初「升呢」做爸爸,同齡太太陳麗麗分娩時經歷「生死一瞬間」,搵命博為他生下愛女「小黃妃」(Miracle)。老來得女,兩公婆非常感恩。

兩夫婦仍要面對好多難關,皆因初生B女有黃疸病,指數近300要照燈去黃,政府醫院好緊張,要黃太日日覆診,日日逼她帶BB入院。正值坐月嘅陳麗麗唔想BB抽血捱痛,再受桔針之苦謂:「好彩聽私家醫生建議改咗餵半人奶半奶粉,黃疸指數開始回落,o依家暫時唔使入院照燈。」 

有女萬事足 ■近日,澤鋒去電台大談初為人父趣事,笑唔停口。

間中拍劇 ■黃澤鋒無放棄過幕前演出,之前同紅姐拍電視劇。

出生時重6磅的「小黃妃」,目前開始收水,體重正常,唯一擔心係黃疸。新生嬰兒黃疸是指嬰兒於出生後一個月內,皮膚及眼白有發黃現象,主要原因是嬰兒血液中的膽紅素過高所引致。若黃疸指數急劇上升,可引致嚴重的後遺症,如失聰、弱智、痙攣等,或對腦細胞造成永久性的傷害。

寶貝女叫Miracle ■52歲陳麗麗高齡誕女,過程驚險,故B女英文名為「Miracle」(奇蹟)。

陳麗麗接受電話訪問時透露,上周去健康院覆診,指B女黃疸指數近300要留醫去黃,她憂心說:「醫院好緊張,日日要我覆診,日日逼我帶BB入院,我話睇吓私家醫生觀察吓先。一嚟囡囡出世時,因為我妊娠毒血爆發,馬上要全身麻醉分娩,囡囡都要吊抗生素,同住ICU監察,我唔想佢咁細個人仔,抽血驗黃疸指數時又再插針,同老公都好心痛呀!另外,我坐緊月又餵緊人奶,到時要日日撲去醫院兩轉餵奶,自己傷元氣,啲奶質量又無咁好,阿女啲黃咪退得慢囉!所以貴啲都要睇私家醫生跟進,改用半人奶半奶粉一周,o依家黃疸有好轉,由14(私家醫生計法)跌落12,醫生建議可試多一周,觀察吓再決定需唔需要入院。」雖然食奶粉BB易去黃,但陳麗麗堅持餵人奶:「我咁嘅年紀仲上到奶,而且BB又肯埋身食奶,唔只囡囡抵抗力好啲,吸啜時仲幫到BB將來顎骨發展,盡可能加埋奶粉一齊餵。」

自放3日假 ■黃澤鋒放自己3日侍產假,因為唔想手停口停,好快已復工教游水。

黃疸漸退 ■澤鋒開心謂囡囡的黃疸指數由高達300,回落至二百。

至於新手爸爸黃澤鋒除咗努力賺錢養家、要幫手湊女,仲要照顧老婆情緒:「產婦情緒好勁,一嚟料就大件事,照顧得妻女唔好係我嘅責任,佢有個寶貝女揸手,我唔敢發惡,乜都就晒老婆!鬼叫係我前世欠咗個女咩!o依家『小黃妃』識得蝦我,會對住我發脾氣扭抱,十幾日人仔都恰死我,反而好怕媽媽。不過,對住B女我冧晒啦!我呵佢叫唔好喊,BB就會收聲,每次換片,就好似中六合彩咁,日日都派『黃金』畀我;而且我落手掃風,掃幾秒就搞掂,呢方面係我強項。o依家心繫阿女,每當有空檔就趕返屋企睇妻女,始終年紀唔細,好好珍惜同家人相處時間,我諗係做咗爸爸之後最大嘅改變。」

黃疸指數300 拒B女再入院 黃澤鋒夫婦 心痛「小黃妃」被針桔

掃風達人 ■澤鋒夫婦湊女不假手於人,認叻話自己係掃風達人 。

半個月人仔 ■日前小黃妃過咗「十二朝」,黃家開心派自家制薑醋豬手蛋,B女好可愛呀!