*

upload_article_image

容祖兒放假前賣大包 農夫搞笑Chilam接力上台

祖兒的粉絲真幸福~

容祖兒紅館個唱踏入第14晚,她先與細佬容逸恆在紅磡360上對唱,嘉賓更是打孖上,請來農夫及張智霖助陣。

容祖兒

容逸恆

農夫上台大展搞笑本領似小型棟篤笑,一開始就玩大踢爆,「其實扮咩驚喜,大家一早知我哋係今晚嘉賓啦,好多人收到whatsapp嘉賓list ,你地都知啦,下場係草蜢!」C君:「我收到,18號農夫,我睇到幾嬲!」祖兒話:「我一早就已決定請你哋做嘉賓㗎啦!我覺得你兩個好OK㗎!兩個天生一對,一個咁高,一個冇咁高。一個長期唔夠飯,呢個食埋佢個碗飯。」陸永:「搵我哋咁樣先夠crazy係咪?你之前全部巨星,原來容祖兒你真係痴線㗎!」C君:「我作為你嘉賓,要同全場觀眾負責,好想講一聲 :『對唔住,好抱歉』,你諗下,大家之前睇個啲張學雲友、劉德華、古天樂,跟住今晚係農夫!你話點算呢真係!」

容祖兒、農夫

祖兒就叫農夫聽下觀眾的反應,觀眾紛紛狂歡呼撐農夫,但兩隻死仔就笑道:「今時今日鬧同讚啲聲係差唔多...」;C君續謂:「我抱歉自把自為應承祖兒做嘉賓,我哋應承大家多一件事,今晚我哋唔再唱任何歌,唔再折磨你哋聽覺,請放心。」然後兩人一同抵死唱《刻不容緩》,說:「我『無自信,人云亦云』,所以我哋兩個咪係娛樂圈到『庸庸碌碌半生』。」觀眾報以熱烈掌聲。C君再講:「如果在座任何朋友想退飛,唔需要唔好意思,我自己都退咗,我睇到今晚嘉賓農夫,我幫你哋諗埋,你點面對睇之前個啲嘉賓啲觀眾,你諗下一齊食飯,你朋友問,你嗰晚邊個嘉賓?人哋話張學友,你話農夫,幾難聽,兩個垃圾。」

容祖兒、農夫

祖兒就直頭笑到收不到聲,不懂回應,只好說:「你哋唔好咁樣話自己,千錯萬錯,係我錯。」 陸永:「你哋唔好怪Joey,佢係我認識最錫歌迷嘅歌手,佢錫嘅程度係非常crazy,crazy到自己假期都唔要,補番場畀你哋!咁錫你歌迷,咁今晚係咪要補?咁嘅嘉賓,嘉賓衰成咁硬係要補啦!」又引得觀眾哈哈大笑之餘更熱烈起哄歡呼!

容祖兒、農夫

C君:「大家知道,容祖兒pretty crazy演唱會,其中最crazy就係盡量希望唱多啲歌畀大家,真係pretty超時!有數得計,每晚大概罰5萬,做完場騷,最少都罰100萬。嘩!係我就唔唱啦!我最想試下8點半開騷,我8點9散場,測試下紅館over要補水,咁under有冇得回水?」陸永:「容祖兒你點解咁對歌迷,你簡直係荼毒香港樂壇,你開演唱會開成咁,咁大制作,叫人哋以後點開演唱會?睇過呢個騷,重點睇其他騷? 」然後反問觀眾:「所以好多人都話最好睇演唱會係邊個?」觀眾狂叫 :「容祖兒!」農夫就叫觀眾齊齊「舉高隻手」,大合唱《舉高隻手》作結。

容祖兒、農夫

農夫離開後,祖兒就好開心同觀眾講:「我想話畀大家聽,我好努力做咗14場,聽日我放假。今日阿姐好高興,決定賣大包,演唱會每晚我都會唱人哋歌,滿足自己慾望,今晚準備咗一首我好喜歡的歌畀大家,希望大家會鍾意呢首歌,然後祖兒唱出《祝君好》。在觀眾沒有心理準備下,張智霖(Chilam)突然升上台同祖兒合唱,無端端又多個靚仔嘉賓睇,觀眾開心到飛起,瘋狂大叫,祖兒就話:「今日想請大家食多粒糖,不是我想請就得,要請得郁先得,大家畀多啲掌聲多謝張智霖!」

張智霖、容祖兒

兩人在台上更披露不可告人的秘密,Chilam話:「我哋兩個關係,正所謂遠親不如近鄰!」祖兒:「今日披露大家知一個秘密!你哋唔好同人講,我哋係同居關係!哈哈!不過,同居,不同層!我哋住同一大廈,見得佢最多係停車場同電梯,同舞台真係第一次!好多謝Chilam,佢拍緊賀歲片,請幾個鐘假嚟支持我,重携眷出席,老婆靚靚(袁詠儀)都嚟埋睇騷!真係多謝佢一家。」

張智霖、容祖兒

Chilam話:「我有個小秘密想話你知,我個仔撞到你幾次,佢好怕醜,你出咗電梯,佢就問我:『Who is she?」我答佢:『She is a diva!』,香港天后,i’m proud of you!係緣份令我哋friend咗咁多。」祖兒見觀眾咁興奮,就拉住Chilam唱多首歌:「大家咁多開心,我帶個靚仔一齊同你哋握下手,再唱下歌啦。」然後兩人同觀眾一同合唱《歲月如歌》,氣氛熱鬧。

張智霖、容祖兒

張智霖、容祖兒

袁詠儀、容祖兒、張智霖