不錫身親自上陣 任賢齊視張家輝為啟蒙老師

兩位都見極之專業敬業的演員！

演員為求逼真，好多時拍動作戲都會不錫身親自上陣，出名專業的張家輝和任賢齊，雖然已分別51歲和53歲，最近在荷里活導演Renny Harlin新作《沉默的證人》中，100分鐘戲份打足全場。兩人相隔15年再合作，小齊就踢爆家輝多年來專業態度不改，無論打戲還是撞車劇，都一樣不錫身親身上陣，還封了家輝做自己啟蒙老師；而家輝亦爆小齊戲中「打晒全部人」，其實好驚整傷對手，又直言要打得逼真，全靠打人和被打者配合得好，特別被打者要演得夠似。

家輝和小齊不少埋身肉搏戲都相當逼真。

電影中，家輝飾演法醫「陳嘉豪」，而小齊演的犯罪頭目「Santa」，帶領兩個手下在平安夜突襲殮屍房劫屍，還要帶着聖誕老人等面具隱藏身份。期間家輝和楊紫演的實習法醫頑強抵抗，自然打鬥連場。而執導過《虎膽龍威續集》的導演Renny Harlin，更設定在殮屍房如困獸鬥的環境，令家輝和小齊全程要鬥智鬥力。 

小齊演的「Santa」好多戲份要戴着面具，但經常被面具弄傷塊面。

家輝大讚導演Renny不但在劇情上，在對白上也花了不少心思。

小齊覺得導演困獸鬥的設定，令電影更緊湊，「娛樂性上面，我覺得荷里活導演好識得計嗰啲節奏。」家輝亦認同，「佢放咗好多西方思想入去，當然包括節奏，幽默感，佢又將啲英文語法放咗落啲對白度，雖然未必好明顯，我覺得有啲新鮮感幾好。」

講到戲中的動作場面，小齊坦言不容易應付，「其實冇乜招式，爛仔交咁，連女仔都打，見到咩就攞嚟打人，好似街頭格鬥咁，有時都要硬食，我同家輝對打時，好彩我哋都拍過好多動作戲，唔係有時唔小心整到，好似我要一腳踢家輝撞玻璃出去，好驚踢唔準。」家輝都認同，「打人嗰個唔係有幾分真，會睇得出嚟，其實佢（小齊）當時驚整親人，整到人自己都唔會舒服㗎嘛！好彩佢接觸好多，經過今次更多啦，咩人都畀你打過咁滯！哈哈！同埋有時打人嗰個成日話唔夠力唔似，其實係畀人打嗰個冇配合受傷嗰下，令到佢唔似，否則呢個點做都唔似。」

張家輝、任賢齊、陳家樂、吳卓羲和郭晉安前晚出席新戲《沉默的證人》首映禮，小齊透露拍攝時弄傷肌肉筋腱，有幾個月要靠枴杖走路。

繼15年前電影《大事件》再跟家輝合作，小齊竟帶點小粉絲遇着偶像的味道狂讚對方，「佢演技梗係愈嚟愈勁，同埋佢細節捉得好準，有時會跳拍，但係同佢排戲時好快可以接軌，因為佢好全面去睇套戲，同埋佢個精神大家好佩服，佢對自己自我要求，做晒演員應有本份，仲可以照顧到其他地方，我都好想再同家輝合作，喺佢身上學到好多嘢。」

家輝除了被打，拍撞玻璃門，甚至畀車撞戲份都全部親身上陣。

被讚到不好意思的家輝，搞笑回應：「唔係呀！我做演員好舒服㗎！」小齊又忍不住再爆，當年拍《大事件》一場撞車戲家輝已親自上陣，今次一樣唔例外，「呢個就係我最佩服佢，佢可以嘅話都幾乎自己嚟。我原本係歌手，我拍戲有啲精神係被家輝影響，好似《激戰》嘅時候，我知道呢個角色好辛苦，我自己都有練過，到睇戲時見到佢，嘩！呢啲就係專業嘅精神，啲人問我之前食肥拍嗰套戲，係咪受印度演員影響，其實係受家輝嘅啟發。」

家輝的專業態度令小齊相當佩服，仲話作為演員也深受對方影響。

之後家輝亦禮尚往來，大讚小齊可塑性高，「佢係大好人，對邊個人都咁好，佢近年集中電影發展，好似最近好肥嗰件嘢呢，你睇得出佢好想做好部戲，小齊嘅形象係有種唔同嘅男人味，但佢自身性格好輕鬆，好率真，你搵佢拍啲好硬朗嘅，佢又騷到畀你，搞笑片佢都有啲嘢都好搞笑，可以有好多可能性。（做導演搵小齊拍戲？）可以呀！我想佢演個好成熟，好靚仔，好有權力嘅人。」

炎明熹一連三場演唱會圓滿結束！

一連三場《大家樂呈獻：炎明熹Gi-FORCE演唱會2024》，昨晚（4月14日）在九龍灣國際展貿中心舉行尾場，亦是去年十月因颱風關係，而取消的補場場次。是晚獲陳煒與丈夫陳國強、姜皓文、陳山聰與囝囝陳霆軒、李幸倪到場支持。

《炎明熹Gi-FORCE演唱會2024》來到尾場。

陳煒、陳山聰、姜皓文到場支持。

來到第三場，Gigi依然狀態大勇，又唱又跳表現落力，不過這晚的後空翻動作發生了一個小插曲，正當Gigi完成空翻動作落地時，可能用力太猛，最終Gigi被衛衣的帽「兜頭笠」，完全遮擋了視線，只見Gigi先露出既可愛又尷尬的笑容，之後秒速整理衣服繼續又跳又唱，緩解了這個蝦碌場面。

Gigi表演後空翻。

落地時可能用力太猛，最終Gigi被衛衣的帽「兜頭笠」。

除了唱自己的歌，當然少不了Gigi的「自選歌單」，當中有王菲的《守望麥田》、Serrini的《網絡安全隱患》、及陶喆的《流沙》等，Gigi笑指這張歌單由逾200首歌精心挑選，她又說：「大家知唔知呢場係補場呢？想問吓嗰時（取消）大家有冇失望？」台下即大叫「冇」，Gigi笑住讚歌迷思想正面。

Gigi笑指「自選歌單」由逾200首歌精心挑選。

在過去三場演唱會擔任Gigi音樂團隊成員的林智樂（Felix），來到尾場按捺不住，要在台上公開力讚Gigi，除了唱功了得，抗壓能力亦很強悍：「雖然有好多人讚佢，但有時都有啲好尖銳嘅留言，但佢都冇嘢，更重要係由我啱啱識佢到而家，佢個初心都冇變，對每個人都好好。有時記者朋友問我會唔會羨慕Gigi嘅事業，我覺得唔係羨唔羨慕，而係佢真係好值得擁有！」身旁的Gigi即感動表示，很少聽對方如此認真說話，並感謝對方為自己唱足三晚。

接着，Gigi獻唱《星語心願》，唱到最後那句「讓你知道我愛你」，台下即熱情回應「我都好愛你呀」。她表示小時候看電影《星願》，已經很喜歡電影的男主角，Gigi隨後唱出《對面的女孩看過來》，任賢齊（小齊）此時突然現身合唱，讓樂迷大為驚喜，更全場大合唱為演唱會掀起高潮。唱畢，Gigi說：「畀啲掌聲任前輩。」小齊謙虛感謝Gigi畀機會自己做嘉賓：「 因為我成間公司所有同事都好鍾意Gigi。噚日我喺新加坡做完演唱會返嚟，我啲夥計全部唔見晒，個個都嚟睇你，仲要一張飛都冇留畀我！同事們，聽住，聽日返工唔使咁早，好好享受今晚Gigi嘅演唱會。」他又笑謂Gigi與自己的女兒同一年出世，小齊搞笑說：「人多嘅時候叫我小齊哥，唔好叫Uncle呀。」

任賢齊驚喜現身。

小齊謙虛感謝Gigi畀機會自己做嘉賓。

之後，Gigi送上繡有小齊名字的水樽：「我知你5月份開巡迴演唱會，所以我揀咗呢個，識自己煲水嘅水樽，呢個可以直接煲水，非常方便，我都繡咗你個名喺度。」小齊自嘲年輕的時候仍會飲凍飲：「漸漸就用咗暖水壺啦，好多謝你。我真係成間公司都講，佢係未來嘅天后，希望大家都畀多啲機會Gigi。」最後小齊再為樂迷送上《我是一隻魚》，全場跟著和唱。

小齊讚Gigi是未來的天后。

除了嘉賓夠份量，這晚的驚喜同樣一浪接一浪，開騷前大批歌迷要求Gigi唱出MV在YouTube短短4天破百萬點擊的新歌《還有一艘救生艙》，收到大家的訴求後，Gigi特意於補場上送予歌迷，但卻一時感觸唱到喊，幾乎大半首歌要台下歌迷代唱，Gigi說：「我覺得我又代入咗首歌裡面，但唔係愛情，今日係最後一場演唱會，即係今日係最後嘅一次，然後大家要遠離我嘅感覺。點解今晚先揀呢首歌嚟唱？因為我想送呢首歌畀補場嘅大家，但係我真係冇用，成首都唱唔到，要大家幫我，我下次會唱好佢㗎。」台下再次大叫「加油」，為哭成淚人的Gigi打氣。

Gigi特意獻唱新歌《還有一艘救生艙》給予今場補場的歌迷。

感觸落淚。

Encore部份，Gigi特別為尾場的樂迷獻唱《你是你本身的傳奇》，坦言台下每位歌迷都是一個傳奇，一起成就了她的歌手夢，Gigi再一次落淚，對於這個人生第一個演唱會舞台、還有台下的觀眾，充滿不捨之情；唱到演唱會最後一首歌《Only For Me》，Gigi叫大家高舉手機燈和唱，望向這遍燈海，Gigi的淚水再一次滑落，令《大家樂呈獻：炎明熹Gi-FORCE演唱會2024》，在淚水與不捨之情下，感動落幕。

全場大合照。