*

upload_article_image

承認楊怡睇婦科 羅仲謙自誇毋須人工受孕

幾時有好消息?

羅仲謙正趕拍TVB新劇《木棘証人》。

羅仲謙恨生仔恨到流口水,曾多次揚言有小朋友嘅家庭先夠完整。噚日40歲生日的楊怡收到老公愛的Order即作出配合,大半年來深居簡出,被老公收埋「養生」。據知,兩公婆不設防之餘仲參考生仔秘方,中西合璧全力出擊,有傳兩公婆更心急到唔排除人工受孕。最近有人多次目擊楊怡出入「生仔聖手」之稱的名醫診所求醫,因而傳出喜訊。目前正趕拍TVB新劇《木棘証人》的謙謙強調「實屬流料」,另35歲的他再三表示自己精力旺盛,健康正常,生仔無難度,暗示毋須人工受孕。

途人要求合照,謙謙來者不拒。

最近羅仲謙重返TVB拍新劇《木棘証人》,日前他在尖沙咀棉登徑拍一場掃黃外景,劇情講述飾演便衣警察的他掃黃期間遇上袁潔儀和男友黃煒溏,因為謙謙跟黃煒溏有「牙齒印」,所以追足他九條街。羅仲謙身穿厚身長袖運動外套,喪跑期間隱約見到41吋「最強胸肌」。精力過人的羅仲謙跑完又跑,無氣喘但跑到成身汗,唔使埋位時要除低外套,吹風扇散熱,見他手瓜起月展,愈操愈大隻,難怪自誇體力好。

謙謙一拍完即刻要除外套及吹風扇散熱。

開工期間,羅仲謙全程四萬咁口,同劇組人員有講有笑,途人「集郵」亦來者不拒,唔通真係人逢喜事精神爽?他急急再三澄清:「係咪恭喜我開工大吉先?都話唔係有咗咯,你信我啦,因為佢每個月都Keep住有check。(即係月事正常?)明就得喇(咁點解楊怡要停工大半年?)因為隨時準備做媽咪,接咗劇要對劇組負責任。」不過,謙謙冇否認老婆睇名醫求子:「我從來冇懷疑過自己『能力』,兩公婆都有做婚前檢查,身體健康都OK同正常。老婆係有Keep住睇婦科,加埋中藥調理身體。」至於可會考慮人工受孕?謙謙避談:「未諗到!」

因為羅氏夫婦生日只差幾日,所以一直都係合體慶祝。

本周三,羅仲謙35歲牛一,壽星仔當日開早班,晚上即約老婆食飯慶生,人肉速遞「交人」。提到生日願望,他說:「講出嚟唔靈㗎,費事愈講愈小器,大家都知我想要啲咩㗎啦。其實最緊要係我同太太身體健康,我哋唔急於生仔,呢啲唔可以強求,反而大家比我心急,多謝你哋呀!」口裏說不,但身體最誠實,謙謙自爆拍劇拍到11月,這3個月狽住個劇,仍然不間斷實行造人大計,行動一定唔會暫緩:「家庭同事業都要兼顧,我唔怕辛苦,最緊要我同佢都唔使四圍飛,時間夠穩定就冇問題,咪努力啲囉,睇天意。」

羅仲謙自誇好勁 唔使人工受孕

羅仲謙及楊怡婚後經常放閃。