*

upload_article_image

囡囡開學 劉愷威趕買書包仔

做老竇當然忙碌。

劉愷威本來一早睇中粉藍色書包仔,但又心多多,揀書包仔揀足半粒鐘。

去年12月,劉愷威同楊冪各自發聲明宣佈結束5年婚姻,兩人協議共同撫養5歲女兒小糯米(劉梓蘭)。其實小糯米一直長住香港並由爺爺嫲嫲湊大,前劉太無乜點理過。上周三下午,做單親爸爸9個月的劉愷威去商場買小朋友書包,這位老竇無Hea揀,望一個拎一個,心大心細,還買埋餐盒仔同文具,為女兒開學做足準備。小糯米阿媽呢?傳她同前韓國JYP內地成員魏大勛拍拖,熱戀期是好難行開的。

楊冪同內地男星魏大勛參加內地綜藝節目《密室大逃脫》而傳緋聞。

楊冪同劉愷威離婚半年,有傳32歲的前劉太搭上30歲,前韓國JYP娛樂內地成員魏大勛,事緣有網友撞見魏大勛跟女友穿情侶鞋拍拖看展覽,二人戴口罩和帽掩人耳目,照片曝光後,網民大玩認人遊戲,發現相中女友應是楊冪,因女方左小腿上有胎記,巧合地楊冪都有相同的胎記。那雙方當然無承認,不過,當年劉愷威同楊冪傳緋聞都否認㗎,而家呢?婚都離埋咯。

劉愷威

大部份國際學校已於上星期開學,就讀港島區國際學校的小糯米當然亦於上周開學,不過,主力在內地搵食的劉愷威好忙,忙到上周先得閒幫個女添置新書包。當日下午,戴了Cap帽,孭住個大黑色Tote Bag的劉生獨自去皇室堡Smiggle看小朋友嘢,見他主力看238蚊的背囊仔,粉紅色、藍色同幻彩色,因為花多眼亂,劉生揀到無乜頭緒,Sales埋身力sell,又開埋袋介紹內裏間隔,劉生點點頭,然後影了幾張相,估計Send畀個女看,等個女自己揀。

店員埋身力Sell,但劉生無聽店員講,自己再揀。

最終揀了個粉紅花花款背囊仔,劉生再看148蚊的水壺仔,248蚊的便當盒同埋28蚊的原子筆,全部都是粉色系,圖案又繽紛,啱晒小妹妹。劉生買足一粒鐘,以上所有嘢全部入手,買完就Call司機接走。

水壺仔盛惠148蚊,劉生揀咗唔太耐,應該無小妹妹唔鍾意粉紅色。

2014年,剛生完小糯米嘅楊冪由劉愷威及家翁劉丹夫婦陪同下出院。

今年7月,劉愷威出席小糯米學校舉行的音樂會,兩父女更同台獻唱。

其實劉愷威父母一直負責湊小糯米,劉愷威有無離婚,小糯米都繼續由爺爺嫲嫲照顧。

其實個書包仔咁細,入面間隔都估到係唔多,不過劉生都想了解吓。

因為實在太多款都好鍾意,所以劉生決定影相畀個女自己揀。