*

upload_article_image

懷疑老公是自己粉絲 王馨平提患病父親狀況即眼濕濕

Linda指爸爸王羽情況不是太好。

王馨平(Linda)最近為翻唱碟《娛樂經典60年》重新演繹經典歌《心有千千結》,自小在台灣長大的她坦言未聽過反而更有新鮮感。她透露婚後依然熱愛音樂,就算近年迷上瑜伽兼任導師,亦無想過放棄唱歌,更自爆懷疑老公也是她的粉絲,而新歌亦會給爸爸王羽試聽。不過,提到王羽中風後身體狀況,Linda卻一度眼濕濕不想多講。

Linda就算幾忙,都不會放棄唱歌,更打算舉行個人音樂會。

12年,Linda陪同王羽出席香港電影金像獎頒獎禮,同場還有惠英紅。

今次在「娛樂唱片」的金曲中選唱《心有千千結》,Linda 全權交給監製譚國政決定,「我之前未同佢合作過,就試下由佢揀適合我唱嘅歌,結果佢揀咗呢首,雖然我喺香港出世,但喺台灣長大真係未聽過,反而我老公聽過,仲話好鍾意呢首歌,我一聽就好有感覺,加上原唱係石修同鍾玲玲嘅合唱版,今次我呢個係獨唱版,改編後感覺幾浪漫,歌迷應該會有新鮮感。」

Linda早前在《流行經典50年》,獻唱《心有千千結》。

Linda跟圈外老公李家輝(Stephen)結婚18年,但她婚後一直無離開過樂壇,就算她近年迷上瑜伽,兩年前更當上導師,一樣keep住製作歌曲及唱片,原來背後有老公支持,「佢本身都好鍾意音樂,雖然佢唔係好識得唱,但係佢成日都聽歌㗎!(係咪你粉絲?)唔知呢?!不過我未識佢之前,佢已經有買我啲碟,第一隻係《愛一生也不夠》。」

除了演繹,Linda近年亦學習了製作歌曲,更曾自資出碟。

問到18年婚姻如何維繫,Linda坦承兩人好少鬧交,「可能我哋結婚時,大家年紀都比較成熟,思想都好穩定,同埋佢係個冇乜脾氣嘅人,就算鬧交,多數都係老公氹番我嘅,但有時老公發起惡嚟都好得人驚,咁我咪猛讚佢好man,咁佢就會即刻收晒火。」講到生B計劃,她坦承早已跟老公放棄,「我哋唔想強求,試過唔成功就算。」

Linda跟從事金融的李家輝,早前外遊慶祝結婚18周年。

提到將獲頒金馬獎終身成就獎的父親王羽,Linda坦承未決定父親到時如何領獎,而她每個月都會跟老公返台探他,也有給新歌父親聽。不過,問到年前二度中風的王羽病情,她邊講邊眼濕濕說:「佢依家喺醫院住,我哋請咗兩個看護照顧佢,佢雖然認得人,但情況唔係咁好。我唔想破壞佢大俠嘅形象,想保留最好一面畀粉絲,所以唔講咁多啦!」

Linda提到王羽身體狀況,即皺着眉眼濕濕。

Linda謂平日主力由兩個妹妹照顧父親,所以一有時間會返台幫手。