*

upload_article_image

劇集煞科樂得清閒 梁漢文有跟得老婆陪購物

Shopping當然開心!

Edmond主攻睇手機配件,愛妻喺身旁耐心守候。

凍齡人夫梁漢文(Edmond),早前接拍ViuTV劇集《假設性無罪》,煞科後樂得清閒,就不時同愛妻Karen(林文慧)行吓山、打網球等過健康生活。日前下午,點都要郁吓嘅Edmond唔做運動,捉實太太去銅鑼灣shopping。見人夫睇吓手機套、配件等,梁太就算無乜興趣都傍到實,去到邊都愛做連體嬰。

單手拎大手袋嘅Edmond,單手揀手機套。

梁漢文08年底同Karen結束愛情長跑拉埋天窗,眨吓眼,二人結婚已逾十年。今年3月,Edmond仲po兩公婆撐枱腳合照,慶祝拍拖21年,人夫留言:「其實我本身係一個好鍾意慶祝嘅人,就算發現呢個月少咗條白頭髮我都會搵個藉口出去慶祝,今日喺我哋拍拖21周年,慶祝啦喂。」

臨走前,悶咗一輪嘅Karen見到運動型帽子,終於有興趣睇睇。

對咗咁多年,梁生梁太都唔厭㗎!Edmond會陪抗乳癌成功嘅老婆行山;Karen亦會陪老公打網球、跑步等。日前,兩公婆恩愛現身銅鑼灣一間家居用品店shopping。見Karen化晒妝、着短裙晒腳好吸睛,Edmond就戴上帽、手拎一個大bag。見主要都係人夫揀手機配件嘢,專心挑選手機套、USB線等,愛妻就喺身邊徘徊守候,幾悶都等。十分鐘後,Edmond揀極唔啱心水,再行去cashier向店員查詢,似未有貨,就無癮偕太太走人。

今年3月,Edmond和太太撐枱腳慶祝拍拖21年。

日前,兩公婆本來去打網球卻下大雨,索性換衫去跑步。