*

upload_article_image

街坊送生果維持秩序 惠英紅任達華好感動

拍戲有優待~~

貴為影后影帝的惠英紅和任達華,最近攜手在電影《我和我的祖國》單元《回歸》中合作演夫婦,戲中紅姐演回歸當日駐守金紫荊廣場的警察;華哥則演鐘錶維修師傅,兩夫妻各自在崗位為回歸努力。紅姐和華哥最難忘在石硤尾街巿拍攝時,大受街坊歡迎,除了不少檔主義務幫手維持秩序外,更猛送各式新鮮生果給他們享用,雖然拍攝時遇到不少困難,簡單一場戲拍足6、7個鐘,但依然被香港人的人情味所感動,亦正是香港可愛之處。

紅姐和華哥老友鬼鬼,不論拍戲或影相,一樣咁有默契。

演過多年警察的紅姐,坦言今次更加易投入角色,因感受是真實的,「回歸當時我都喺香港,自己係中國人,回歸我最大驕傲有咗國籍,所以處理角色跟足當時喺電視機見到嘅畫面,當時踏正12點鐘,全港紀律部隊換徽章,呢部份歷史我知,我演嘅係廣場裏面嘅警察,我演嘅時候將我見到,同對回歸嗰種興奮放番落去就得,分別只係着咗制服,同埋去到現場即刻學步操同口號。」

紅姐演回歸當日駐守金紫荊廣場的警察。

反而首次演鐘錶維修師傅的華哥,竟然話壓力大,因戲中要修理的古董手錶,由上海博物館借出,價值70多萬,「我整整吓發覺個螺絲批太大,我都好大壓力,咪等攞到支啱嘅先整,博物館借出嚟好驚整壞咗嘛!」幸好華哥本身是手錶迷,整錶手法不用花時間專登學,「由細路開始儲手錶到o依家,我屋企有好多手錶,我成日將啲唔郁嘅錶拆開又整番埋,手勢都好熟,上次演補鞋師傅反而要學。手錶對我嚟講好緊要,細個6、7歲望住爸爸返工,佢永遠早15分鐘出門口,我o依家拍戲或者約人都會準時,因注重每個細節,成件事就會做得好。」

華哥首次演鐘錶維修師傅,形神俱似。

講到最難忘的場口,紅姐和華哥都認為是在石硤尾街巿的戲份,華哥說:「嗰日拍我間喺樓梯口嘅錶舖,因街巿環境好多雜聲,要花好多時間等。」紅姐補充:「好似突然有車響按聲,又有人嗌『任達華喎!』」華哥續說:「唯一可愛,可以食好多水果,因為隔離係生果店,不時攞啲最好水果畀我哋食。」紅姐即投訴:「畀你冇畀我,我畀錢買㗎!人哋做小生意我冇攞,因為拍咗一日唔好意思,同埋有啲平時好難搵嘅水果嗰度都有,結果我買咗兩大袋走。」華哥又大讚街坊好幫手,「佢哋雖然冇份參與都好幫忙,香港人嘅人情味真係好濃,互相幫忙,令我哋愈拍愈感動。」紅姐都認同,「可能我哋去之前,啲工作人員同佢哋講過係拍回歸嘅戲,所以好開心,佢哋冇收錢都肯幫手上埋鏡,啲老闆都會出嚟幫手維持秩序,睇到大家嗰份團結。」

戲中紅姐和華哥飾演恩愛夫妻。

這天華哥講到康復情況,自言恨足6個星期終可以做運動,更甜爆因禍得福,獲太太琦琦和14歲囡囡晴佳整的愛心花膠和甜品,「你睇我係咪皮膚好咗,毛孔咁細嘅!成個都靚晒!」紅姐即笑說:「我冇食花膠,花膠好貴食唔起呀!」華哥仲甜到出晒面狂讚囡囡,「佢中西甜品都識,但係佢整雪耳糖水時,最初用咗沙糖,我覺得怪怪哋,佢即刻上網睇,於是再用冰糖整,佢知我唔食咁甜,仲減咗糖嘅。」

華哥講到康復情況,即搞笑大賣廣告問紅姐:「夜晚11點你會做咩?」紅姐神回:「飲海參湯,係全膠原蛋白。」

華哥右手雖然仲有啲腫,但已可以出汗。

華哥早前到中山出席活動時,被刀捅傷腹部與手指,留醫多日才出院。

紅姐好開心在香港拍戲,街坊都好支持。